- కార్యకర్తల సమావేశంలో అచ్చంపేట, కల్వకుర్తి ఎమ్మెల్యేలు
నాగర్కర్నూల్, వెలుగు: దేశంలో ఏ రాష్ట్రంలో చేపట్టని విధంగా తెలంగాణలో ప్రారంభం కానున్న సమగ్ర కుటుంబ సర్వేలో కాంగ్రెస్ క్యాడర్ కీలకంగా వ్యవహరించాలని అచ్చంపేట ఎమ్మెల్యే వంశీకృష్ణ, కసిరెడ్డి నారాయణరెడ్డి సూచించారు. శనివారం తమ క్యాంప్ ఆఫీసుల్లో కార్యకర్తలతో సమావేశాలు నిర్వహించి సమగ్ర సర్వేలో ఎన్యుమరేటర్లకు పూర్తి సహకారం అందించాలని దిశానిర్దేశం చేశారు. సామాజిక న్యాయం అందించేందుకు చేపట్టిన సర్వేలో పూర్తి వివరాలు తెలుసుకునేందుకు ప్రభుత్వం, కాంగ్రెస్ పార్టీ చర్యలు తీసుకుంటుందని పేర్కొన్నారు.
గ్రామాలు, హామ్లెట్ విలేజ్లు, మున్సిపల్ వార్డుల వారీగా నిర్వహించే సర్వేకు కాంగ్రెస్ క్యాడర్ తోడుగా ఉండాలని సూచించారు. సర్వేకు వచ్చే ఎన్యుమరేటర్లకు కాంగ్రెస్ కార్యకర్తలు, నాయకులు, ప్రజాప్రతినిధులు సహకరించాలని, సర్వేకు సహకరించే వారికే స్థానిక సంస్థలు, మున్సిపల్ ఎలక్షన్లో పోటీ చేసే అవకాశం కల్పిస్తామని భరోసా ఇచ్చారు. ప్రభుత్వం అమలు చేస్తున్న పథకాలను ప్రజల్లోకి తీసుకెళ్లడంతో పాటు ప్రభుత్వం చేపట్టే ప్రతి కార్యక్రమం క్షేత్రస్థాయిలో పకడ్బందీగా అమలయ్యేలా చూడాల్సిన బాధ్యత కాంగ్రెస్ క్యాడర్పై ఉందన్నారు. సీనియర్లు, జూనియర్లు అనే తేడా లేకుండా అందరూ ఈ ప్రక్రియలో భాగస్వాములై గుర్తింపు పొందేందుకు ఇదొక మంచి అవకాశమని చెప్పారు. ఈ సమావేశాల్లో మున్సిపల్, మార్కెట్ చైర్మన్లు, మాజీ ప్రజాప్రతినిధులు, సీనియర్ నాయకులు, ముఖ్య కార్యకర్తలు పాల్గొన్నారు.
