- యాక్సిడెంట్లతో గాల్లో కలుస్తున్న ప్రాణాలు
- పట్టణంలో పెరిగిన ట్రాఫిక్ సమస్యలు
- ప్రకటనలకే పరిమితమైన రింగ్రోడ్డు నిర్మాణం
మెదక్, వెలుగు: మెదక్పట్టణం గుండా ఎటు వెళ్లాలన్నా ఒకే రోడ్డు దిక్కవుతోంది. జిల్లాలోని వివిధ మండలాల వారితో పాటు, పొరుగు జిల్లాల వారు హైదరాబాద్, బోధన్, బాన్సువాడ, సిద్దిపేట, వరంగల్, సంగారెడ్డి, జహీరాబాద్, కర్నాటక రాష్ట్రంలోని బీదర్ కు వెళ్లాలంటే మెదక్ పట్టణం మీదుగానే వెళ్లాలి. బోధన్, బాన్సువాడ, కామారెడ్డి, సిద్దిపేట, దుబ్బాక, సంగారెడ్డి, మెదక్ ఆర్టీసీ డిపో బస్సులు, ప్రైవేట్వాహనాలు, బోధన్, గోదావరిఖని నుంచి హైదరాబాద్ఇసుక తరలించే పెద్ద పెద్ద లారీలు, మెదక్ చుట్టు పక్కల నుంచి కంపెనీలకు, రోడ్ల నిర్మాణానికి మట్టి, స్టోన్డస్ట్, కంకర తరలించే టిప్పర్లు, కంపెనీల కు ముడిసరుకు, ప్రొడక్ట్స్ తీసుకెళ్లే భారీ కంటెయినర్ లారీలు అన్నీ పట్టణం మధ్యలో ఉన్న రోడ్డు మీదుగానే వెళ్లాలి.
పట్టణంలో జనాభా పెరగడంతోపాటు, జిల్లా కేంద్రమైన తర్వాత ఆయా మండలాల నుంచి కలెక్టరేట్లో ఉన్న ఇతర డిపార్ట్ మెంట్లలోపనుల కోసం ప్రజలు, ప్రజా ప్రతినిధులు, మండల అధికారుల రాకపోకలు ఎక్కువ కావడంతో ట్రాఫిక్ బాగా పెరిగింది. బస్సులు, కార్లు, బైక్లు ఎక్కువ సంఖ్యలో తిరుగుతుండగా ఇదే రోడ్డు మీదుగా భారీ వెహికల్స్ రాకపోకలు సాగిస్తుండడంతో ఇబ్బందులు ఎదురవుతున్నాయి. ట్రాఫిక్ నిబంధనలు పాటించకుండా స్పీడ్గా వెళ్తుండడం, చౌరస్తాల్లో సిగ్నల్ పడినా పట్టించుకోకపోవడం వల్ల తరచూ ప్రమాదాలు జరుగుతున్నాయి. దీంతో ప్రజల ప్రాణాలు గాల్లో కలుస్తున్నాయి.
ప్రమాదాలు ఇలా..
గతేడాది నవంబర్లో దీపావళి రోజు పట్టణంలోని మెయిన్రోడ్డుమీద గోల్కోండ వీధి దగ్గర ఓవర్ స్పీడ్తో వెళ్తున్న టిప్పర్స్కూటీని ఢీకొనడం వల్ల కవల పిల్లలు మృతి చెందారు. వారి తల్లి తీవ్రంగా గాయపడింది. నాలుగు నెలల కింద న్యూబస్ స్టాండ్సమీపంలో టిప్పర్ బైక్ను ఢీకొట్టడంతో జంబికుంటకు చెందిన ఓ వ్యక్తి స్పాట్లోనే ప్రాణాలు కోల్పోయాడు.
తాజాగా రెండు రోజుల కింద రాందాస్ చౌరస్తాలో నడుచుకుంటూ రోడ్డు దాటుతున్న వ్యక్తిని టిప్పర్ ఢీకొట్టడంతో అక్కడికక్కడే చనిపోయాడు.
టిప్పర్లు, ఇసుక లారీలు, భారీ కంటెయినర్లుపట్టణం మధ్యలో నుంచి ఉన్న రోడ్డు మీదుగా కాకుండా బయట నుంచి వెళ్లేందుకు వీలుగా రింగ్ రోడ్డు, బైపాస్ రోడ్డు ఉంటే ఇలాంటి ప్రమాదాలు జరిగే ఆస్కారం ఉండదని జనాలు భావిస్తున్నారు.
హైవేల అనుసంధానంతో..
హైదరాబాద్ బాలానగర్ నుంచి నర్సాపూర్ మీదుగా మెదక్ పట్టణం వరకు నేషనల్ హైవే (765 డి) నిర్మాణం పూర్తయింది. మెదక్ పట్టణం నుంచి రామాయంపేట మీదుగా సిద్దిపేట వరకు మరో నేషనల్ హైవే నిర్మాణ పనులు జరుగుతున్నాయి. ఇటీవల మెదక్ నుంచి కామారెడ్డి జిల్లా ఎల్లారెడ్డి మీదుగా బోధన్ వరకు మరో నేషనల్ హైవే నిర్మాణ పనులు మొదలయ్యాయి. ఇలా మెదక్ పట్టణానికి మూడు హైవేల అనుసంధానం ఏర్పడుతుండడంతో ట్రాఫిక్ మరింత పెరగనుంది. మూడు హైవేలు వచ్చినా రింగ్ రోడ్డు లేదా బైపాస్ రోడ్డు లేకపోవడడం వల్ల ఇబ్బందులు తప్పని పరిస్థితి నెలకొంది.
ప్రకటనలకే పరిమితం
గత బీఆర్ఎస్ ప్రభుత్వం 2016లో జిల్లాల పునర్ వ్యవస్థీకరణ చేపట్టిన క్రమంలో కొత్త జిల్లా కేంద్రాలకు రింగ్ రోడ్డు మంజూరు చేస్తామని ప్రకటించింది. ఈ క్రమంలో మెదక్ పట్టణానికి రింగ్రోడ్డు మంజూరవుతుందని అప్పటి మంత్రి హరీశ్రావు, అప్పటి మెదక్ఎమ్మెల్యే పద్మా దేవేందర్రెడ్డి చెప్పారు. ఆర్అండ్బీ అధికారులతో కలిసి ఎక్కడి నుంచి రింగ్ రోడ్డు నిర్మించాలనే దాని గురించి పరిశీలన చేశారు. కానీ రింగ్ రోడ్డు నిర్మాణం ప్రకటనకే పరిమితమైంది. ప్రస్తుత ప్రభుత్వమైన ట్రాఫిక్ ఇబ్బందులు, ప్రమాదాలు గుర్తించి మెదక్ పట్టణానికి రింగ్ రోడ్డు మంజూరు చేయాలని మెదక్ పట్టణ, పరిసర ప్రాంత వాసులు కోరుతున్నారు.
