తెలుగు, తమిళ స్టార్ సిద్ధార్ద్ (Siddarth), హీరోయిన్ అదితి రావ్ హైదరి (Aditi Rao Hydari) వివాహం ఘనంగా జరిగింది. తెలంగాణలోని వనపర్తి జిల్లా శ్రీరంగాపురంలోని 400 ఏళ్ల పురాతన రంగనాథస్వామి ఆలయంలో ఈ జోడీ వివాహం చేసుకున్నారు. నిశ్చితార్థం చేసుకున్న ఆరు నెలల తర్వాత ఈ జంట ఇప్పుడు కలిసి ఏడు అడుగులు వేయడం విశేషం.
తాజాగా సోమవారం (సెప్టెంబర్ 16న) వీరి వివాహ వేడుకకు సంబంధించిన ఫొటోస్ ను హీరోయిన్ అదితి ఇంస్టాగ్రామ్ ద్వారా షేర్ చేసింది. "నువ్వే నా సూర్యుడు, నా చంద్రుడు మరియు నా నక్షత్రాలన్నీ..."శాశ్వతత్వం కోసం నీతో సోల్‌మేట్స్‌గా ఉండటానికి...నవ్వడానికి, ఎప్పటికీ..ఎటర్నల్ లవ్, లైట్ & మ్యాజిక్..శ్రీమతి & మిస్టర్ అండ్ -సిద్ధు" అంటూ తన బ్యూటీఫుల్ ఫీలింగ్ ను తెలిపింది అదితి.
కాగా ఈ వివాహ వేడుకకు ఇరు కుటుంబ సభ్యులు, అత్యంత సన్నిహితులు మాత్రం హాజరయ్యారు. ప్రస్తుతం ఈ ఫొటోస్ సోషల్ మీడియాలో వైరల్ అవుతుండటంతో..నూతన వధూవరులకు అభిమానులు, నెటిజన్స్ శుభాకాంక్షలు చెబుతున్నారు. ఈ రంగనాథస్వామి ఆలయంలోనే వీరి నిశ్చితార్థం జరగగా..పెళ్లి కూడా అక్కడే ఉంటుందని ఈ జంట ఇదివరకే వెల్లడించింది.
ఇకపోతే ఇద్దరికీ ఇది రెండో పెళ్లి కావడం విశేషం. సుధీర్ బాబు నటించిన సమ్మోహనం సినిమాతో అదితి తెలుగు ఇండస్ట్రికి పరిచయం అయ్యారు. ప్రస్తుతం వీరిద్దరూ వరుస సినిమాలతో బిజీగా ఉన్నారు.
అదితి, సిద్ధార్థ్ జంటగా అజయ్ భూపతి దర్శకత్వం వహించిన మహా సముద్రం(2021) మూవీలో నటించారు. ఈ సినిమా చిత్రీకరణ సమయంలోనే వీరు ప్రేమలో పడినట్లు తెలుస్తోంది. అప్పటినుంచి ఇద్దరూ వెకేషన్‌కు, ఈవెంట్స్‌కు కలిసే వెళ్తున్నారు. టాలీవుడ్ హీరో శర్వానంద్‌ ఎంగేజ్‌మెంట్‌, పెళ్లికి సైతం జంటగా హాజరవడంతో వీరి ప్రేమ నిజమేనని అభిమానులు భావించారు.
