- హైకోర్టు తీర్పుపై దయాకర్
హైదరాబాద్, వెలుగు : బీఆర్ఎస్ ఎమ్మెల్యేల పార్టీ ఫిరాయింపులపై హైకోర్టు ఇచ్చిన తీర్పును స్వాగతిస్తున్నామని కాంగ్రెస్ నేత అద్దంకి దయా కర్ చెప్పారు. అయితే గతంలోనూ కోర్టు ఇలాగే స్పందించి ఉంటే బాగుండేదని, బీఆర్ఎస్లో కాంగ్రెస్ ఎల్పీ విలీనమయ్యేది కాదని అన్నారు. మీడియాకు సోమవారం అద్దంకి దయాకర్ ఒక వీడియోను విడుదల చేశారు. ‘‘పార్టీ మారిన బీఆర్ఎస్ఎమ్మెల్యేల విషయంలో నిర్ణయం తీసుకోవాలని స్పీకర్ను హైకోర్టు ఆదేశించడాన్ని స్వాగతిస్తున్నాం.
అయితే, ఆనాడు కాంగ్రెస్ ఎమ్మెల్యేలు ఒక్కొక్కరుగా బీఆర్ఎస్ లో చేరుతున్నా హైకోర్టు స్పందించలేదు. ఇప్పటిలా స్పీడ్గా స్పందించి ఉంటే పరిస్థితులు ఇంకోలా ఉండేవి’’ అని వీడియోలో అద్దంకి దయాకర్ పేర్కొన్నారు. హైకోర్టు పరిధిలోనే స్పీకర్, కాంగ్రెస్ నిర్ణయాలు ఉంటాయని చెప్పారు. ‘‘కేసీఆర్ తీసుకున్న అనైతిక నిర్ణయాల వల్లే రాష్ట్రంలో ఇలాంటి రాజకీయ పరిస్థితులు నెలకొన్నాయి.
Also Read :- ఖమ్మం జిల్లాలో వరద నష్టం రూ.340 కోట్లు
కేసీఆర్ వైఫల్యాలతోనే బీఆర్ఎస్ ఎమ్మెల్యేలు ఆ పార్టీపై నమ్మకం లేక కాంగ్రెస్ లోకి వస్తున్నారు. కేసీఆర్ బయటకు రాకపోవడంతో పాటు కేటీఆర్, హరీశ్రావు మధ్య నాయకత్వ సమస్యలు ఉండడం వల్లే ఎమ్మెల్యేలు బీఆర్ఎస్ను వీడుతున్నారు’’ అని తెలిపారు.
