యాదాద్రి, వెలుగు: గ్రంథాలయాల్లో పోటీ పరీక్షలకు అవసరమయ్యే బుక్స్ అందుబాటులో ఉంచాలని అడిషనల్ కలెక్టర్వీరారెడ్డి అధికారులను ఆదేశించారు. గురువారం కలెక్టరేట్‌‌‌‌లో గ్రంథాలయాల పనితీరుపై రివ్యూ నిర్వహించారు. ఈ సందర్భంగా మున్సిపాలిటీలు, పంచాయతీల నుంచి గ్రంథాలయాలకు రావాల్సిన బకాయిల గురించి అధికారులు ప్రస్తావించారు. సెస్ రాకపోవడంతో ఆర్థిక భారం పడుతోందని వివరించారు.
అనంతరం అడిషనల్ కలెక్టర్ మాట్లాడుతూ... సెస్ బకాయిలు వెంటనే క్లియర్ చేయాలని ఆదేశించారు. లైబ్రరీల్లో అన్ని వసతులు కల్పించడంతో పాటు విద్యార్థులు వినియోగించుకునేలా అవగాహన కల్పించాలని సూచించారు. ఈ కార్యక్రమంలో జిల్లా గ్రంథాలయ సంస్థ కార్యదర్శి ఎం సుధీర్, డీఈవో కే నారాయణరెడ్డి, డీపీవో సునంద, డీపీఆర్వో పీ వెంకటేశ్వరరావు, మున్సిపాలిటీల కమిషనర్లు పాల్గొన్నారు.
