అటవీశాఖతో జాయింట్ ఆపరేషన్
ఆదిలాబాద్, వెలుగు: వన్యప్రాణులను కాపాడేందుకు అటవీశాఖ అధికారులు ఆర్మ్డ్ రిజర్వ్ పోలీసులతో కలిసి రంగంలోకి దిగారు.. మహారాష్ట్రలోని తాడోబ నుంచి కవ్వాల్ అటవీ రేంజ్లోకి వస్తున్న పులులను కాపాడేందుకు పక్కా ప్రణాళిక సిద్ధం చేశారు. టైగర్జోన్లో రెండు రోజులుగా అడవులను జల్లెడ పడుతున్నారు. మిగతా ప్రాంతాల్లోనూ వేటగాళ్ల ముఠా గురించి ఆరా తీస్తున్నారు. కారిడార్ దాటుతున్న సమయంలో వేటగాళ్లు పొంచి ఉండి పులులను వేటాడుతున్నారని వైల్డ్ లైఫ్ క్రైమ్ కంట్రోల్ బోర్డ్ (డబ్ల్యూసీసీబీ), ఎన్టీసీఏ బృందాలు హెచ్చరించాయి.
‘కవ్వాల్ టైగర్జోన్లో వేటగాళ్లు’ పేరట వెలుగు ఓ కథనాన్ని ప్రచురించింది. దీంతో అటవీ అధికారులు అప్రమత్తమయ్యారు. స్మగ్లర్లు, వేటగాళ్లను పట్టుకునేందుకు సరిహద్దుల్లో నిఘా వేశారు. సిర్పూర్ టి, వాంకిడి, కెరమెరి అడవుల్లో పోలీస్, అటవీశాఖ బలగాలు మోహరించి, ఉమ్మడి జిల్లాలోని ప్రభావిత ప్రాంతాలను పర్యవేక్షిస్తున్నాయి. ఇచ్చోడ, ఖానాపూర్, పెంబి రాజురా బోథ్, మామడ, సారంగాపూర్, దస్తురాబాద్, జన్నారం ప్రాంతంలోని కవ్వాల్ అభయారణ్యంలో అధికారులు నిఘా పెంచారు.
