న్యూఢిల్లీ: ఎన్సీపీ(ఎస్పీ) చీఫ్ శరద్ పవార్ మహారాష్ట్ర డిప్యూటీ సీఎం ఏక్నాథ్ షిండేను సన్మానించిన తర్వాత ప్రతిపక్ష మహా వికాస్ అఘాడి (ఏవీఏ)లో గందరగోళం నెలకొంది. ఈ పరిస్థితుల్లో శివసేన (యూబీటీ) నాయకుడు ఆదిత్య థాక్రే.. బుధవారం రాత్రి ఢిల్లీలో కాంగ్రెస్ అగ్రనేత రాహుల్ గాంధీని కలిశారు. ఈ సందర్భంగా ఎన్నికల నిర్వహణలో ఎలక్షన్ కమిషన్‌‌‌‌‌‌‌‌పై వచ్చిన ఆరోపణలపై ఈ ఇద్దరూ చర్చించినట్లు తెలిసింది.
కాగా, గత వారం ఢిల్లీలో జరిగిన అసెంబ్లీ ఎన్నికల్లో ఓటమి పాలైన ఆమ్ ఆద్మీ పార్టీ(ఆప్) కన్వీనర్ అర్వింద్ కేజ్రీవాల్‌‌‌‌‌‌‌‌ను కూడా ఆదిత్య థాక్రే కలవనున్నట్టు తెలిసింది. 2022లో ఉద్ధవ్ థాక్రే ప్రభుత్వాన్ని కూల్చేందుకు అప్పటి అవిభక్త శివసేన శాసనసభ్యులలో ఎక్కువ మందితో కలిసి ఏక్నాథ్ షిండే.. బీజేపీలోకి వెళ్లిన సంగతి తెలిసిందే. దీంతో బీజేపీ మద్దతుతో ఆయన సీఎం అయ్యారు.
తరువాత శివసేనపై నియంత్రణ సాధించాడు. కాగా, ఇటీవల శరద్ పవార్.. షిండేకు మహాద్జీ షిండే రాష్ట్ర గౌరవ్ పురస్కార్‌‌‌‌‌‌‌‌ను ప్రదానం చేసి సన్మానించారు. దీంతో మహారాష్ట్ర ప్రతిపక్ష ఏవీఏ గందరగోళంలో పడింది. కాగా, ఉద్ధవ్ థాక్రే నేతృత్వంలోని శివసేన వర్గం.. షిండేను దేశద్రోహిగా అభివర్ణించింది.
