హైదరాబాద్ సిటీలో నిత్యావసరాల కల్తీ రోజురోజుకు పెరిగిపోతుంది. నిత్యావసరాలుగా మనం రోజు ఉపయోగించే పసుపు, అల్లం, వెల్లుల్లి పేస్ట్, సబ్బులు, నూనెలు ఇలా అన్ని రకాల వస్తవులు కల్తీ చేస్తున్నారు కల్తీగాళ్లు. హైదరాబాద్ సిటీలో ఏది కొనాలన్నా..జనం కల్తీ భయంతో జంకుతున్నారు. ఇటీవల కల్తీ అల్లం వెల్లుల్లి పేస్ట్, నూనెలు తయారు చేసి అమ్ముతున్న ఘటనలు వెలుగు చూడగా..తాజాగా కల్తీ కారం తయారు చేస్తున్న ఓ వ్యక్తిని హైదరాబాద్ సెంట్రల్ జోన్ పోలీసులు అరెస్ట్ చేశారు.
ఆఫ్జల్ గంజ్ లో ఓ ఇంటిపై దాడి చేసిన సెంట్రల్ జోన్ పోలీసులు.. 35 కేజీల కల్తీ కారం పొడిని స్వాధీనం చేసుకున్నారు. నిందితుడు రూపారామ్ ఖత్రీని అరెస్ట్ చేశారు. కారం పొడి ఎర్రగా కనిపించేందుకు, తూకం వచ్చేందుకు ఎరుపు రంగు, విషపూరిత రంగులు, నూనెలు కలిపి కల్తీ చేస్తున్నట్లు పోలీసులు గుర్తించారు. కల్తీ కారం పొడిని బ్రాండెడ్ కంపెనీల పేర్లతో ప్యాకింగ్ చేసి అమ్ముతున్నట్లు తెలిపారు.
