- తాలిబాన్ల పాలనలో జనం ఆగమాగం
- చుక్కలనంటిన ధరలు.. పెరిగిన నిరుద్యోగం
- పేదరికం 97 శాతానికి పెరగొచ్చంటున్న ఎక్స్పర్ట్స్
వాషింగ్టన్: తాలిబాన్లు అఫ్గానిస్తాన్ను చేజిక్కించుకున్నాక పేదరికం, నిరుద్యోగం, ద్రవ్యోల్బణం (ఇన్ ఫ్లేషన్) పెరగడంతో ఇల్లు గడవక జనం అల్లాడుతున్నారు. చాలా మంది ఇంట్లో ఉండే సామాన్లు, విలువైన వస్తువులను రోడ్ల మీద పెట్టి అమ్ముకుంటున్నారు. ఫ్రిజ్లు, కార్పెట్లు, టీవీలు, కప్ బోర్డులు, సోఫాలతో కాబూల్ రోడ్లన్నీ మార్కెట్లలా కనిపిస్తున్నాయి. ‘నేను ఫ్రిజ్ను రూ. 25 వేలకు కొన్నా. కానీ రూ. 5 వేలకు అమ్మేశా. ఏం చేయమంటారు మరి? నా పిల్లలకు తిండి పెట్టాలి’ అని కాబూల్లో ఓ దుకాణ యజమాని లాల్ గుల్ చెప్పాడు. కాబూల్లో పోలీస్ ఆఫీసర్గా పని చేసిన ఓ వ్యక్తి మార్కెట్లో పని చేస్తున్నాడు. ‘నాకు జీతం ఇవ్వలేదు. బతకడానికి ఏదో ఓ పని చేసుకోవాలిగా’ అని ఆయన చెప్పాడు. తాలిబాన్లు అధికారంలోకి రాకముందు దేశంలో 72 శాతమున్న పేదరికం ఇప్పుడు 97 శాతానికి పెరిగిందని ఐక్యరాజ్యసమితి ఇదివరకే తెలిపింది. దేశంలో మున్ముందు తిండి దొరకడం కష్టమవుతుందని, జనం ఆకలితో చనిపోయే పరిస్థితి రావొచ్చని ఎక్స్పర్ట్స్ఆందోళన వ్యక్తం చేస్తున్నారు.
ఆగిపోయిన విదేశీ సాయం
తాలిబాన్లు ఆగస్టు 15న అఫ్గాన్ను తమ అధీనంలోకి తీసుకున్నాక పరిస్థితులు వేగంగా దిగజారుతున్నాయి. తాలిబాన్లు ఆక్రమించుకున్నప్పటి నుంచి విదేశాలు రెగ్యులర్గా ఇచ్చే సాయాన్ని నిలిపేశాయి. అమెరికా రూ. 69 వేల కోట్లను అఫ్గాన్ సెంట్రల్ బ్యాంకుకు ఆపేసింది. చాలా వరకు ఎకనమిక్ యాక్టివిటీ స్తంభించిపోయింది. సాధారణ, అత్యవసర సేవలన్నీ ఆగిపోయాయి. బ్యాంకు సేవలూ నిలిచిపోయాయి. దీంతో అఫ్గాన్లో ద్రవ్యోల్బణం, నిరుద్యోగం, పేదిరకం పెరిగాయి. అఫ్గాన్ తాలిబాన్ల చేతిలోకి రాకముందే దేశ జనాభాలో సగం(1.8కోట్లు) మంది సాయం కోసం ఎదురు చూస్తున్నారని ఐక్యరాజ్యసమితి హై కమిషనర్ ఫర్ రెఫ్యూజీస్ ఫిలిప్పో చెప్పారు.
అంత వరకూ చర్చలుండవ్: ఐఎంఎఫ్
అఫ్గాన్లో తాలిబాన్ సర్కారు గుర్తింపుకు సంబంధించి అంతర్జాతీయంగా క్లారిటీ వచ్చే దాకా ఆ దేశంతో చర్చలు ఉండవని ఇంటర్నేషనల్ మానిటరీ ఫండ్ (ఐఎంఎఫ్) వెల్లడించింది.
