- చిన్మయ్ కృష్ణదాస్ను కలిసేందుకు జైలుకు వెళ్లిన శ్యామ్ దాస్ ప్రభు
- వారెంట్ లేకున్నా అదుపులోకి..మరో 3 టెంపుల్స్ పైనా దాడులు
- ఇస్కాన్ కోల్కతా వైస్ ప్రెసిడెంట్ రాధారమణ్ దాస్ వెల్లడి
ఢాకా: బంగ్లాదేశ్లో మరో హిందూ లీడర్ను పోలీసులు అరెస్ట్ చేశారు. ఛట్టోగ్రామ్ జైలులో ఉన్న హిందూ లీడర్ చిన్మయ్ కృష్ణదాస్ను కలిసేందుకు వెళ్లిన ఇస్కాన్ సభ్యుడు శ్యామ్ దాస్ ప్రభును పోలీసులు ఎలాంటి వారెంట్ లేకుండానే అరెస్ట్ చేశారని ఇస్కాన్ కోల్ కతా వైస్ ప్రెసిడెంట్ రాధారమణ్ దాస్ శుక్రవారం రాత్రి వెల్లడించారు. బంగ్లాదేశ్లో హిందూ మైనార్టీలపై దాడులు రోజురోజుకూ పెరుగుతున్నాయని ఆయన ట్విట్టర్లో ఆందోళన వ్యక్తం చేశారు.
‘‘ఇస్కాన్ సభ్యుడు శ్యామ్ దాస్ ప్రభు ఏమైనా టెర్రరిస్ట్లా కన్పిస్తున్నారా? ఇస్కాన్కు చెందిన అమాయక బ్రహ్మచారీల(మెంబర్స్) అరెస్ట్లు తీవ్ర దిగ్ర్భాంతిని కలిగిస్తున్నాయి. బంగ్లాదేశ్ ప్రభుత్వం వెంటనే హిందూ లీడర్లను రిలీజ్ చేయాలి” అని ఆయన డిమాండ్ చేశారు. భైరబ్ లోని ఇస్కాన్ సెంటర్ పైనా శుక్రవారం దుండగులు దాడి చేశారని రాధారమణ్ దాస్ ఓ వీడియోను పోస్ట్ చేశారు. దీంతోపాటు మరో మూడు హిందూ టెంపుల్స్ పైనా దాడి చేసి విధ్వంసానికి పాల్పడ్డారన్నారు.
బంగ్లాదేశ్లో హిందువులకు భద్రత కల్పించాలని ఆ దేశ ప్రభుత్వాన్ని కోరారు. అయితే, శ్యామ్ దాస్ ప్రభు అరెస్ట్పై బంగ్లాదేశ్ పోలీసుల నుంచి అధికారికంగా ఎలాంటి ప్రకటన విడుదల కాలేదు. కాగా, శుక్రవారం ఛట్టోగ్రామ్లోని శాంతనేశ్వరి మాత్రి టెంపుల్, షోనీ టెంపుల్, శాంతనేశ్వరి కాళీబరి టెంపుల్ పై వందలాది మంది మతపరమైన నినాదాలు చేస్తూ దాడులు చేసినట్టు బీడీన్యూస్24.కామ్ వెల్లడించింది.
