బాసర, వెలుగు: నిర్మల్జిల్లా బాసరలోని ఆర్జీయూకేటీలో విద్యార్థులు శుక్రవారం ఆందోళన చేపట్టారు. ఎగ్జామ్ వాల్యుయేషన్లో వర్సిటీ అధికారులు తప్పులు చేసినట్టు ఆరోపిస్తూ నిరసన తెలిపారు. గతంలోనూ కావాలనే రెండో సెమిస్టర్లో ఫెయిల్ చేశారని పలువురు విద్యార్థులు పేర్కొన్నారు. వర్సిటీలో వాల్యుయేషన్ సరిగా చేయడంలేదని మండిపడ్డారు. వర్సిటీలో సెమిస్టర్ 2 పరీక్షలు ఇటీవల ముగిశాయి. తాజాగా ఫలితాలు వెల్లడించారు. ఇందులో పలువురు విద్యార్థులు ఫెయిల్ అయ్యారు.
అనుమానం వచ్చిన కొందరు స్టూడెంట్స్ రీవాల్యుయేషన్కు దరఖాస్తు చేసుకోగా ఉత్తీర్ణత సాధించారు. దీంతో తప్పుడు వాల్యుయేషన్ చేసిన అధికారులపై చర్యలు తీసుకోవాలని డిమాండ్ చేశారు. అయితే.. కొన్ని సబ్జెక్టుల్లోని బ్యాక్ లాగ్స్ ఉన్నాయని అధికారులు చెప్పడంపై విద్యార్థులు తీవ్ర అసంతృప్తి వ్యక్తం చేశారు. సెమిస్టర్ పరీక్షల వాల్యుయేషన్లో అధికారుల తప్పిదాలతో విద్యార్థుల జీవితాలు ప్రశ్నార్థకంగా మారుతాయని తల్లిదండ్రులు పేర్కొన్నారు.
వర్సిటీ ఉన్నతాధికారులు వెంటనే స్పందించి సంబంధిత అధికారులపై చర్యలు తీసుకోవాలని, ఇలాంటి ఘటనలు మరోసారి జరగకుండా చూడాలని కోరారు. వాల్యుయేషన్లో తప్పులు దొర్లాయని విద్యార్థులు చేసిన ఫిర్యాదుపై వర్సిటీ వీసీ దృష్టికి తీసుకెళ్లినట్లు ఏవో రణధీర్ సాఘి తెలిపారు. వీసీ నిర్ణయం మేరకు కమిటీ వేసినట్లు, నివేదిక ఆధారంగా చర్యలు తీసుకుంటామని చెప్పారు.
