యాదాద్రి జిల్లాలో యాసంగి వడ్ల దిగుబడి 7 లక్షల టన్నులు

• సెంటర్లకు 4.50 లక్షల టన్నులు 
• మిల్లర్లు 2.50 లక్షలు కొంటారని అగ్రికల్చర్ అంచనా
• 70 లక్షలకు పైగా గన్నీ బ్యాగులు
• 280 పైగా సెంటర్లు ఏర్పాటు
• యాసంగి వడ్ల కొనుగోళ్లపై ఆఫీసర్ల కసరత్తు

యాదాద్రి, వెలుగు : యాసంగి సీజన్​లో వడ్ల దిగుబడి భారీగా వస్తుందని అగ్రికల్చర్ డిపార్ట్​మెంట్ ​అంచనా వేసింది. ఎకరానికి 25 నుంచి 26 క్వింటాళ్ల వడ్ల దిగుబడి వస్తుందని లెక్కలు వేసింది. కొనుగోళ్ల విషయంలో ఆఫీసర్లు కసరత్తు ప్రారంభించారు. గన్నీ బ్యాగుల ఇండెంట్​తోపాటు ఎన్ని సెంటర్లు ఏర్పాటు చేయాలన్న అంశంపై లెక్కలు వేస్తున్నారు. యాదాద్రి జిల్లాలో 2024–-25 యాసంగి సీజన్​లో ఎప్పటిలాగే వరి సాగుకే రైతులు ప్రియారిటీ ఇచ్చారు. జిల్లావాప్తంగా 2.75 లక్షల ఎకరాల్లో వరిని సాగు చేశారని పంటల నమోదు ద్వారా అగ్రికల్చర్ ఆఫీసర్లు లెక్కలు వేశారు. అయితే ఈ సీజన్​లో ఒక్కో ఎకరానికి 25 క్వింటాళ్లకు పైగా దిగుబడి వస్తుందని లెక్కలు వేశారు. ఈ లెక్కన సాగు చేసిన 2.75 లక్షల ఎకరాల్లో 7 లక్షల టన్నులకు పైగా దిగుబడి వస్తుందని ఆఫీసర్లు అంచనా వేస్తున్నారు. 

సెంటర్లకు 4.50 లక్షల టన్నులే..

ఈ సీజన్​లో ఎక్కువగా దొడ్డు రకం పండిస్తున్నందున, ఆ వడ్ల కొనుగోలులో మిల్లర్లు ముందస్తుగా ప్లానింగ్​ చేసుకుంటున్నారు. దిగుబడి 7 లక్షల టన్నులకు పైగా వస్తున్నా.. దీనిలో 2 లక్షల టన్నుల నుంచి 3 లక్షల టన్నుల వరకు మిల్లర్లు కొనుగోలు చేసే అవకాశం ఉందని ఆఫీసర్లు అంచనా వేశారు. అమౌంట్ వెంటనే ఇస్తున్నందున రైతులు కూడా మిల్లర్ల వైపు మొగ్గు చూపే అవకాశాలున్నాయి. కాగా మిల్లర్లు కొనుగోలు చేసినా.. సివిల్​సప్లయ్ ఏర్పాటు చేసే కొనుగోలు సెంటర్లకు 4.50 లక్షల టన్నులు వస్తాయని అగ్రికల్చర్ ఆఫీసర్లు 
చెబుతున్నారు. 

70 లక్షలకు పైగా గన్నీలు..

వడ్ల కొనుగోలుపై ఆఫీసర్లు కసరత్తు చేస్తున్నారు. దిగుబడి 7 లక్షల టన్నులు వస్తున్నా.. కొనుగోలు సెంటర్లకు వచ్చే వడ్ల కోసం సివిల్ సప్లయ్ డిపార్ట్​మెంట్ ఆఫీసర్లు ఎంతమేరకు గన్నీ బ్యాగులు అవసరమో లెక్కలు వేస్తున్నారు. సెంటర్లకు 4.50 లక్షల టన్నులే వస్తాయని అంచనా వేస్తున్నందున, 70 లక్షలకు పైగా గన్నీ బ్యాగులు అవసరం పడుతాయని సివిల్ సప్లయ్ డిపార్ట్​మెంట్​లెక్క వేసింది. 280 నుంచి 300 కొనుగోలు సెంటర్లను ఏర్పాటు చేసేందుకు ప్లానింగ్​వేస్తోంది. ఇప్పటికే మిల్లర్లతో ఆఫీసర్లు మీటింగ్​నిర్వహించారు. వడ్లను స్టాక్​చేయడానికి వీలుగా అవసరమైన ప్లేస్ ఏర్పాటు చేసుకోవాలని సూచించారు. కాగా ఈనెల 11న వడ్ల కొనుగోలు ఏజెన్సీలతో ప్రత్యేకంగా మీటింగ్ నిర్వహించనున్నారు.