భద్రాద్రికొత్తగూడెం, వెలుగు : గ్రామాల్లో తిరిగి నాసిరకం విత్తనాలు అమ్మితే వారిపై చీటింగ్ కేసు నమోదు చేస్తామని జిల్లా అగ్రికల్చర్ ఆఫీసర్ బాబూరావు మంగళవారం హెచ్చరించారు. తక్కువ ధరకు విత్తనాలు వస్తున్నాయంటూ లైసెన్స్ లేకుండా అమ్మే విత్తనాలు కొని రైతులు మోసపోవద్దని సూచించారు. జిల్లాలో రెండు టాస్క్ ఫోర్స్ టీమ్స్ ఏర్పాటు చేశామన్నారు.
ప్రత్యేక నిఘా : ఎస్పీనాసిరకం విత్తనాలను అరికట్టేందుకు జిల్లా వ్యాప్తంగా ప్రత్యేక నిఘా ఏర్పాటు చేశామని ఎస్పీ బి. రోహిత్ రాజు మంగళవారం తెలిపారు. అమాయక రైతులను మోసం చేస్తూ అక్రమార్జనే ధ్యేయంగా నాసిరకం విత్తనాలను కొందరు విక్రయిస్తున్నారని తెలిపారు. ఈ క్రమంలో జిల్లా వ్యాప్తంగా అన్ని పోలీస్ స్టేషన్ల పరిధిలో విత్తన దుకాణాల్లో తనిఖీలు చేయనున్నట్టు తెలిపారు.
డీఎస్పీ సమావేశం..
జూలూరుపాడు : జూలూరుపాడు మండల కేంద్రంలోని ఏవీఆర్ ఫంక్షన్ హాల్ లో ఫెర్టిలైజర్స్ అండ్ ఫెస్టిసైడ్స్ షాపు యజమానులతో కొత్తగూడెం డీఎస్పీ అబ్దుల్ రెహమాన్ మంగళవారం సమావేశం ఏర్పాటు చేశారు. నాసిరకం విత్తనాలు అమ్మితే కఠిన చర్యలు తప్పవని హెచ్చరించారు. విత్తనాలు కొనుగోలు చేసిన రైతులకు తప్పనిసరిగా రశీదు ఇవ్వాలని సూచించారు.
అశ్వారావుపేట : అశ్వారావుపేట పోలీస్ స్టేషన్ లో పురుగు మందుల షాపు యజమానులతో సీఐ జితేందర్ రెడ్డి మంగళవారం సమావేశం ఏర్పాటు చేశారు. లైసెన్సులు లేకుండా రైతులకు విత్తనాలు అమ్మొద్దని ఆయన
సూచించారు.
గుండాల : ఫెర్టిలైజర్ ఫెస్టిసైడ్స్ అమ్మే వ్యాపారస్తులు నాసిరకం విత్తనాలు తెచ్చి రైతులను మోసం చేస్తే యాక్షన్ తప్పదని సీఐ రవీందర్ హెచ్చరించారు. మంగళవారం మండల కేంద్రంలోని వ్యాపారస్తులను పిలిపించి మాట్లాడి పలు నిబంధనలను వివరించారు.
అశ్వాపురం : అశ్వాపురం మండలంలో నిబంధనలకు విరుద్ధంగా ప్రవర్తించే విత్తనాలు, ఎరువులు, పురుగు మందుల డీలర్ల పై కఠిన చర్యలు తీసుకుంటామని సీఐ అశోక్ రెడ్డి తెలిపారు. మంగళవారం అశ్వాపురం పోలీస్ స్టేషన్లో విత్తన డీలర్లతో ఏర్పాటు చేసిన ప్రత్యేక మీటింగ్లో ఆయన మాట్లాడుతూ రైతులకు సకాలంలో నాణ్యమైన విత్తనాలు సరఫరా చేయాలని సూచించారు.
