- కోర్టుల్లో వాదనలకు సమర్థంగా పనిచేస్తుందంటున్న రీసర్చర్లు
- చెక్ రిపబ్లిక్లో నిర్వహించిన సదస్సులో బెస్ట్ పేపర్గా అవార్డు
హైదరాబాద్, వెలుగు: కోర్టుల్లో వాదనలు వినిపించేందుకు సాక్షులు, వారి వాంగ్మూలాలు, కేసు వివరాలు ఎంత ముఖ్యమో.. అలాంటి కేసుల్లో కోర్టులు ఇచ్చిన గత తీర్పుల ప్రస్తావన కూడా అంతే ముఖ్యం. అలాంటి తీర్పులను ఫిజికల్గా సంపాదించడం, వాటిలోని ముఖ్యాంశాలను తీసుకోవడం కొంచెం కష్టమైన పనే. కేసులకు పాత తీర్పుల్లోని సైటేషన్లను ఆర్టిఫిషియల్ ఇంటెలిజెన్స్(ఏఐ) ద్వారా తెలుసుకునే ప్రయత్నం చేసి సఫలం అయ్యారు ఇంటర్నేషనల్ ఇన్ స్టిట్యూట్ ఆఫ్ ఇన్ఫర్మేషన్ టెక్నాలజీ హైదరాబాద్ (ఐఐఐటీ హెచ్) రీసర్చర్లు.
అయితే, ఆయా సైటేషన్ లోని ఫ్రేజులు, పేరాలు, వాక్యాల ఆధారంగా ఇప్పటిదాకా ఏఐ ద్వారా గత తీర్పులను రిట్రీవ్ చేస్తున్నా.. అందుకు భిన్నంగా ఐఐఐటీ హెచ్ రీసర్చర్లు ‘యాంకర్ టెక్స్ట్’ను దీని కోసం వాడుకున్నారు. ప్రొఫెసర్ పి.కృష్ణారెడ్డి నేతృత్వంలో సెకండియర్ ఎంఎస్ రీసర్చ్ స్టూడెంట్ గౌరంగ్ పాటిల్ .. యాంకర్ టెక్స్ట్ ద్వారా గత తీర్పులను ఏఐ సాయంతో రిట్రీవ్ చేసి సక్సెస్ అయ్యారు. ‘సైటేషన్ యాంకర్ టెక్స్ట్ ఫర్ ఇంప్రూవింగ్ ప్రిసిడెంట్ రిట్రీవల్: యాన్ ఎక్స్పరిమెంటల్ స్టడీ ఆన్ ఇండియన్ లీగల్ డాక్యుమెంట్స్’ పేరిట ఆయన రీసర్చ్ చేశారు. ఈ రీసెర్చ్ పేపర్ను కొద్ది నెలల క్రితం చెక్ రిపబ్లిక్లో నిర్వహించిన 37వ ఇంటర్నేషనల్ కాన్ఫరెన్స్ ఆన్ లీగల్ నాలెడ్జ్ ఇన్ఫర్మేషన్ సిస్టమ్ సదస్సుకు సమర్పించారు. గౌరంగ్ పాటిట్ సమర్పించిన ఈ రీసర్చ్ పేపర్కు ‘బెస్ట్ పేపర్ అవార్టు’ లభించింది.
ఏంటీ యాంకర్ టెక్స్ట్
ఓ వెబ్ పేజీకి సంబంధించి పూర్తి యూఆర్ఎల్కు బదులుగా.. కావాలనుకున్న వెబ్ పేజీని డైరెక్ట్గా ఓపెన్ చేయడమే హైపర్ లింక్ టెక్స్ట్ యాంకర్ టెక్ట్స్ అని గౌరంగ్ పాటిల్ తెలిపారు. 1990, 2000 దశకాల్లో ఈ యాంకర్ టెక్స్ట్ వాడకం ఎక్కువగా ఉన్నదని, దీనిని వాడుకుంటే వెబ్ సెర్చింగ్ మరింత సులభమవుతుందని ఆయన పేర్కొన్నారు. దానిని లీగల్ డొమెయిన్లో వాడుకుంటే మరింత సమర్థవంతమైన ఫలితాలను సాధించేందుకు వీలుంటుందని చెబుతున్నారు.
గౌరంగ్ తన ప్రయోగంలో భాగంగా ఇప్పటికే సుప్రీంకోర్టులు ఇచ్చిన తీర్పుల్లోని కొన్ని పదాలు, టెక్స్ట్లను తీసుకుని డేటా సెట్స్ను తయారు చేశారు. ప్రస్తుతమున్న విధానాలతో పోలిస్తే యాంకర్ టెక్స్ట్ టెక్నిక్ ద్వారా మరింత సులభంగా ఆయా తీర్పులను రిట్రీవ్ చేయగలిగామని ఆయన తెలిపారు. ఈ టెక్నిక్ను మరింత అభివృద్ధి చేసే దిశగా తమ పరిశోధనలను కొనసాగిస్తామని చెప్పారు.
