న్యూఢిల్లీ: రాజ్య సభలో అతిపెద్ద డిస్టబెన్స్ చైర్మన్ జగదీప్ ధన్కడేనని ఏఐసీసీ చీఫ్ మల్లికార్జున ఖర్గే విమర్శించారు. రాజ్య సభ చైర్మన్పై అవిశ్వాస తీర్మానం తీసుకురావడానికి గల కారణాలను బుధవారం (డిసెంబర్ 11) ఖర్గే మీడియాకు వివరించారు. రాజ్యసభలో ఏర్పడుతోన్న అంతరాయాలకు అతిపెద్ద కారణం చైర్మన్ ధన్కడేనని.. సభలో ఆయన స్కూల్ హెడ్ మాస్టర్లా ప్రవర్తిస్తున్నారని విమర్శించారు. సభలో బీజేపీ అధికార ప్రతినిధిలా వ్యవహరిస్తూ.. విపక్షాలకు చెందిన సీనియర్ ఎంపీలను దూషిస్తున్నారని మండిపడ్డారు.
రాజ్యసభ ఛైర్మన్‌పై తమకు ఎలాంటి వ్యక్తిగత కోపం లేదని.. ప్రజాస్వామ్యాన్ని రక్షించడానికి మరో మార్గం లేకే ఈ నిర్ణయం తీసుకున్నామని స్పష్టం చేశారు. 1952 నుండి ఇప్పటి వరకు ఉప రాష్ట్రపతిని తొలగించే తీర్మానం ఏదీ ప్రవేశపెట్టలేదని.. ఎందుకంటే ఆ పదవిలో ఉన్నవారు ఎవరూ ధన్కడ్లా వ్యవహరించలేదన్నారు. నిష్పాక్షికంగా, రాజకీయాలకు అతీతంగా నిబంధనల ప్రకారం సభను నడిపారని గుర్తు చేశారు. ధన్కడ్ మాత్రం అందుకు విరుద్ధంగా ప్రవర్తిస్తూ.. బీజేపీ అధికార ప్రతినిధిలా నడుచుకుంటున్నారని.. అందుకే దేశ చరిత్రలో తొలిసారిగా తప్పని పరిస్థితుల్లో రాజ్య సభ చైర్మన్ను తొలగించేందుకు అవిశ్వాస తీర్మానం తీసుకురావాల్సి వచ్చిందని తెలిపారు.
ALSO READ | మహారాష్ట్ర కేబినెట్ విస్తరణకు ముహూర్తం ఫిక్స్.. శివసేనకు గుండె పగిలే వార్త చెప్పిన బీజేపీ లీడర్..!
కాగా, బీజేపీ తొత్తులా వ్యవహిస్తు్న్నారని.. సభలో తమకు మాట్లాడేందుకు అవకాశం ఇవ్వడం లేదంటూ రాజ్య సభ చైర్మన్ జగదీప్ ధన్కడ్పై విపక్షాలు అవిశ్వాస తీర్మానం ప్రవేశపెట్టిన విషయం తెలిసిందే. కాంగ్రెస్ నేత్వత్వంలోని ఇండియా కూటమి తీసుకువచ్చిన ఈ నో కాన్ఫిడెన్స్ మోషన్కు కూటమిలోని టీఎంసీ, ఆప్, ఇతర పార్టీలు మద్దతు ఇచ్చాయి. అయితే, సంఖ్యా బలం ప్రకారం ఈ తీర్మానం ఆమోదం పొందే అవకాశం లేదు. ఎందుకుంటే సభలో ఇండియా కూటమికి మెజార్టీ లేదు. రాజ్యసభలో బీజేపీ, దాని మిత్రపక్షాలకు 121 మంది సభ్యులు ఉండగా.. ప్రతిపక్షాలకు 86 మంది సభ్యులున్నారు. న్యూట్రల్గా ఉన్న వైఎస్‌ఆర్‌సీపీ, బీజేడీ, ఏఐఏడీఎంకే, బీఆర్‌ఎస్‌, బీఎస్పీ వంటి పొత్తులేని పార్టీలకు రాజ్య సభలో మొత్తం 24 మంది సభ్యులు ఉన్నారు.
