వనపర్తి, వెలుగు: ఉమ్మడి మహబూబ్నగర్ జిల్లాలోని రెండు పార్లమెంట్ స్థానాల్లో కాంగ్రెస్ పార్టీ అభ్యర్థులను గెలిపించుకొని సోనియా గాంధీ రుణం తీర్చుకోవాలని ఏఐసీసీ సెక్రటరీ సంపత్కుమార్ కోరారు. మంగళవారం వనపర్తిలో ‘రేవంతన్నకు దండుగా ప్రజాపాలనకు అండగా’ ర్యాలీ నిర్వహించారు. భగీరథ విగ్రహం నుంచి రాజీవ్ చౌక్ వరకు జరిగిన ర్యాలీలో పాల్గొన్నారు. ఈ సందర్భంగా ఆయన మాట్లాడుతూ గతంలోని బీఆర్ఎస్ ప్రభుత్వం ప్రజా సంక్షేమాన్ని పక్కన పెట్టడంతోనే ప్రజలు కాంగ్రెస్ పార్టీకి అధికారం ఇచ్చారన్నారు.
అసెంబ్లీ ఎన్నికల సందర్భంగా ఇచ్చిన ఆరు గ్యారంటీల్లో ఐదింటిని అమలు చేశామని, ఇంకోటి కూడా త్వరలోనే పూర్తి చేస్తామన్నారు. మోసపూరిత బీజేపీ సర్కారును గద్దె దించి కాంగ్రెస్ పార్టీని గెలిపించేందుకు దేశ ప్రజలంతా సిద్ధంగా ఉన్నారని తెలిపారు. నిరుద్యోగ యువతకు కేంద్ర ప్రభుత్వం బేషరతుగా క్షమాపణలు చెప్పాలని డిమాండ్ చేశారు. డీసీసీ అధ్యక్షుడు రాజేంద్రప్రసాద్, ఏఐపీసీ కో ఆర్డినేటర్ ఆదిత్యరెడ్డి, రాములు, కోట్ల రవి, యాదయ్య, దివాకర్, రోహిత్ పాల్గొన్నారు.
