సనత్నగర్లో ప్రమాదకరస్థాయిలో ఎయిర్ పొల్యూషన్..కారణం ఇదేనా!

• డేంజర్​జోన్​లో సనత్​నగర్! 
• తీవ్ర స్థాయిలో వాయు కాలుష్యం.. మీటర్​లో 431 ఏక్యూఐ నమోదు

హైదరాబాద్ సిటీ, వెలుగు: హైదరాబాద్​లోని సనత్ నగర్ లో ఎయిర్ క్వాలిటీ..డేంజర్ లెవెల్స్​కు చేరింది. సోమవారం ఏకంగా 431 ఏక్యూఐ (ఎయిర్ క్వాలిటీ ఇండెక్స్) నమోదైంది. సోమవారం మధ్యాహ్నం 3.05 గంటల ప్రాంతంలో ఈ వ్యాల్యూ నమోదైందని, క్రమంగా ఈ లెవెల్స్ తగ్గుతూ‌‌ వచ్చాయని టీజీ పీసీబీ అధికారులు తెలిపారు. 

మరోవైపు గ్రేటర్​లో సగటున 108 ఏక్యూఐ నమోదైందని, జూ పార్క్ లో 135, పటాన్ చెరువులో 112 తప్ప గ్రేటర్​లో గాలి నాణ్యతను సూచించే 14 స్టేషన్లలో ఎక్కడా 100 ఏక్యూఐ దాటలేదని స్పష్టం చేశారు. ఎయిర్ క్వాలిటీ ఇండెక్స్​లో గాలి నాణ్యత 0 నుంచి- 50లోపు నమోదైతే ఆ గాలి చాలా స్వచ్ఛంగా (గుడ్ క్వాలిటీ) ఉన్నట్టని తెలిపారు. 

51 నుంచి -100 వరకు ఉంటే గాలి నాణ్యత సంతృప్తికర స్థాయిలో (సాటిస్ ఫాక్చరీ క్వాలిటీ) ఉందని, 101-–200 మధ్య ఉంటే కాస్త అనారోగ్యకరం (మోడరేట్ క్వాలిటీ) అని, 200–-300 వరకు ఉంటే పూర్ క్వాలిటీ అని, 301 నుంచి --400 వరకు ఉంటే వెరీ పూర్ క్వాలిటీ అని వివరించారు.  401 నుంచి 500 వరకు అత్యంత ప్రమాదకర స్థాయి అని చెప్పారు.  

సోమవారం సనత్​నగర్​లో 431 ఏక్యూఐ నమోదైంది. నిరుడు నవంబర్ 25న సనత్​నగర్​లో 298, డిసెంబర్​లో 229, జనవరిలో 171 ఏక్యూఐ నమోదైంది. సనత్ నగర్ ఇండస్ట్రియల్ ఏరియా కావడంతో ఎప్పుడూ అసాధారణ వ్యాల్యూస్ నమోదవుతుంటాయి. అయితే, ఎప్పుడూ లేనంతగా సోమవారం ప్రమాదకర స్థాయిలో వ్యాల్యూస్ రికార్డు కావడం ఆందోళన కలిగిస్తున్నది.

మీటర్ పక్కన జనరేటర్స్ ఉన్నయ్

హైదరాబాద్​లోని సనత్ నగర్​లో ఎయిర్ క్వాలిటీ లెక్కించే మీటర్ పక్కన రెండు కంపెనీలకు చెందిన జనరేటర్లు ఉన్నాయని టీజీ పీసీబీ సీనియర్ సైంటిస్ట్ ప్రసాద్ తెలిపారు. ఒక్కోసారి గాలి ఎక్కువ వీచినప్పుడు ఎయిర్ క్వాలిటీ లెవల్స్ పడిపోతుంటాయన్నారు. జనరేటర్ల కారణంగానే సోమవారం మధ్యాహ్నం 431 ఏక్యూఐ నమోదై ఉండొచ్చని తెలిపారు. భయపడాల్సిన పని లేదన్నారు. సనత్​నగర్​లో ఉన్న మీటర్​ను అక్కడి నుంచి మారుస్తామని చెప్పారు.