కాటారం,వెలుగు : బీఆర్ఎస్ ప్రభుత్వం గొప్పగా చెప్పుకున్న కాళేశ్వరం ప్రాజెక్ట్ దేశంలోనే అతిపెద్ద స్కాం అని జయశంకర్ భూపాలపల్లి కాంగ్రెస్ పార్టీ డీసీసీ ప్రెసిడెంట్ ఐత ప్రకాశ్రెడ్డి పేర్కొన్నారు.గురువారం కాటారం మండలకేంద్రంలోని కాంగ్రెస్ పార్టీ కార్యాలయంలో విలేకరుల సమావేశం ఏర్పాటుచేసి మాట్లాడారు. కాళేశ్వరం ప్రాజెక్ట్లో భాగంగా నిర్మించిన మేడిగడ్డ బ్యారేజీ నాణ్యత లోపంతో కుంగిపోవడం యావత్తు దేశానికి తెలుసని అలాంటి ప్రాజెక్టుతో మళ్లీ రాజకీయాలకు బీఆర్ఎస్ ప్రభుత్వం తెరలేపుతుందని ప్రకాశ్రెడ్డి అన్నారు.
ఛలో మేడిగడ్డ పేరుతో బీఆర్ఎస్ పార్టీ మేడిగడ్డకు రావడం సిగ్గుచేటని అవినీతి చేసినందుకుగానూ తెలంగాణ ప్రజానీకానికి మేడిగడ్డ వద్ద క్షమాపణలు చెప్పాలని హితవు పలికారు.లక్షల కోట్ల ప్రజా ధనాన్ని దుర్వినియోగం చేసి కాళేశ్వరం ప్రాజెక్టుని తమ కుటుంబం కోసమే కేసీఆర్ నిర్మించుకున్నారని అలాంటి తప్పు చేయడమే కాకుండా మేడిగడ్డ పర్యటన పేరుతో రాజకీయాలు చేయడం సిగ్గు చేటని అన్నారు.కార్యక్రమంలో కాటారం ఎంపీపీ పంతకాని సమ్మయ్య,కాంగ్రెస్ పార్టీ ప్రెసిడెంట్ ప్రభాకర్రెడ్డి,నాయకులు కొట్టె ప్రభాకర్,దేవేందర్యాదవ్,అశోక్,తదితరులు పాల్గొన్నారు.
