అజయ్ దేవగన్, మాధవన్, జ్యోతిక ప్రధానపాత్రల్లో నటించిన హిందీ చిత్రం ‘సైతాన్’. వికాస్‌ బెహల్ దర్శకుడు. ఇదొక సైకలాజికల్ థ్రిల్లర్. ‘ఇప్పటికే పోస్టర్స్‌, టీజర్‌‌‌‌తో ఆసక్తి రేపిన మేకర్స్, గురువారం ట్రైలర్‌‌‌‌ను విడుదల చేశారు. ‘నా కూతురును కాపాడండి, అతడు నా కూతురుని చంపేస్తాడు’ అని జ్యోతిక ఫోన్‌‌లో పోలీసులకు కంప్లైంట్‌ చేయడంతో ట్రైలర్ మొదలైంది. ‘ఓ పదినిమిషాలు ఫోన్ చార్జ్ పెట్టుకుని వెళ్లిపోతాను’ అంటూ ఇంట్లోకి వచ్చాడు మాధవన్.
కానీ ఆ తర్వాత బయటకు వెళ్లడానికి నిరాకరించాడు. అజయ్ దేవగన్, జ్యోతికల కూతురును తన బ్లాక్ మ్యాజిక్‌‌తో కట్టడి చేసి, చిత్రహింసలు పెడుతున్నాడు. అతని కోసం తల్లిదండ్రులపైనే ఆమె దాడి చేస్తోంది. అతను ఎందుకిలా చేస్తున్నాడు.. బ్లాక్ మ్యాజిక్ నుంచి ఆ ఫ్యామిలీ ఎలా బయటపడింది అనేది మిగతా కథ. సినిమాపై ఆసక్తి పెంచేలా ట్రైలర్ కట్ చేశారు. గత ఏడాది ఫిబ్రవరిలో వచ్చిన ‘వశ్‌’ అనే గుజరాతీ సినిమాకు ఇది రీమేక్. ఒరిజినల్‌‌లో కూతురుగా నటించిన జానకి బోడివాలానే ఇందులోనూ నటించింది. జియో స్టూడియోస్‌ సమర్పణలో అజయ్ దేవగన్, జ్యోతి దేశ్‌‌పాండే, అభిషేక్ పాఠక్ నిర్మిస్తున్నారు. మార్చి 8న విడుదల కానుంది.
