కోలీవుడ్ స్టార్ అజిత్‌‌కు టాలీవుడ్‌‌లోనూ సెపరేట్ ఫ్యాన్ ఫాలోయింగ్ ఉంది. ప్రస్తుతం ఆయన బ్యాక్ టు బ్యాక్ సినిమాలు చేస్తున్నారు. అందులో మగిళ్‌ తిరుమేని దర్శకత్వంలో తెరకెక్కుతున్న ‘విడాముయర్చి’ ఒకటి. లైకా ప్రొడ‌‌క్షన్స్ బ్యానర్‌‌‌‌పై సుభాస్కరన్ నిర్మిస్తున్నారు. ఈ చిత్రాన్ని సంక్రాంతికి విడుద‌‌ల చేయనున్నట్టు శుక్రవారం ప్రకటించారు. ఈ అనౌన్స్‌‌మెంట్‌‌తో పాటు టీజర్‌‌‌‌ను కూడా రిలీజ్ చేశారు మేకర్స్.
ఇందులో స్లిమ్‌ అండ్‌ ఫిట్‌‌గా కనిపిస్తున్న అజిత్, స్టైలిష్‌‌లుక్‌‌లో ఆకట్టుకున్నారు. ‘ప్రపంచ‌‌మంతా నిన్ను న‌‌మ్మక‌‌పోయినా ఫర్వాలేదు.. నిన్ను నువ్వు న‌‌మ్ముకో..’ అనే కాన్సెప్ట్‌‌తో యాక్షన్ ఎంటర్‌‌‌‌టైనర్‌‌‌‌గా ఈ చిత్రం ప్రేక్షకుల ముందుకొస్తుందని టీజర్ ద్వారా రివీల్ చేశారు. తాను సాధించాల్సిన ల‌‌క్ష్యం కోసం ఏం చేయ‌‌టానికైనా, ఎంత దూరం వెళ్లటానికైనా, ఎవ‌‌రినైనా ఎదిరించేలా అజిత్ కనిపిస్తున్న తీరు సినిమాపై అంచనాలు పెంచేలా ఉంది.
అజిత్ నటిస్తున్న 62వ చిత్రమిది. త్రిష హీరోయిన్‌‌గా నటిస్తోంది. రెజీనా, అర్జున్‌ కీలక పాత్రలు పోషిస్తున్నారు. అనిరుధ్ రవిచందర్ సంగీతం అందిస్తున్నాడు. అజిత్ నటించిన చాలా చిత్రాలు పొంగల్‌‌కి వచ్చి సక్సెస్ సాధించాయి. అదే సెంటిమెంట్ ఇప్పుడు కూడా కొనసాగిస్తున్నారు దర్శక నిర్మాతలు.
