కాలం కలిసిరాకపోతే కర్రే పామై కరుస్తుందట. బీఎస్పీ చీఫ్ మాయావతికి ఇప్పుడు ఇదే అనుభవం ఎదురైంది. యూపీలో రాజకీయంగా ఆమెకు బ్యాడ్ టైమ్ నడుస్తూనే ఉంది. అఖిలేశ్ యాదవ్ ఆధ్వర్యంలోని ఎస్పీని లోక్సభ ఎన్నికల తర్వాత కరివేపాకులా తీసిపారేసిన ఆమెకు బైఎలక్షన్లో ఓటర్లు ఓ రేంజ్లో షాక్ ఇచ్చారు. ఆ పార్టీతో పొత్తు వద్దనుకున్నందుకు బెహన్జీ తగిన మూల్యమే చెల్లించుకున్నారు. ఉప ఎన్నికల్లో ఒంటరిగా పోటీ చేసిన ఎస్పీ మూడు చోట్ల గెలవగా బీఎస్పీ అసలు ఖాతాయే తెరవలేకపోయింది.
మహారాష్ట్ర, హర్యానా అసెంబ్లీ ఎన్నికల ఫలితాలు ప్రతిపక్ష పార్టీలకు పెద్ద ఊరటనిచ్చాయి. అలాగే ఉత్తరప్రదేశ్ బైఎలక్షన్ రిజల్ట్ కూడా సమాజ్వాదీ పార్టీలో ఉత్సాహం నింపింది. ఆ రాష్ట్రంలో 11 స్థానాలకు ఉప ఎన్నికలు జరగ్గా 8 సీట్లను అధికార బీజేపీ, దాని మిత్రపక్షాలు కైవసం చేసుకున్నాయి. మిగతా మూడు సెగ్మెంట్లలో ఎస్పీ గెలిచింది. ఆ ఎనిమిది చోట్ల సైతం ఎస్పీ.. బీజేపీకి గట్టి పోటీనిచ్చింది. ముఖ్య విషయం ఏంటంటే బహుజన్ సమాజ్ పార్టీ(బీఎస్పీ)తో పొత్తు లేకుండా ఎస్పీ ఒంటరిగా పోటీచేసి విజయం సాధించింది.
ఈ ఏడాది ఎండాకాలంలో జరిగిన లోక్సభ ఎన్నికల్లో యూపీలో అఖిలేష్ యాదవ్ నాయకత్వంలోని ఎస్పీ, మాయావతి లీడర్షిప్లోని బీఎస్పీ.. గ్రాండ్ అలయెన్స్ కట్టి బరిలో నిలిచాయి. ఆ ఎలక్షన్లో బీఎస్పీ 10 నియోజకవర్గాల్లో గెలుపొందగా ఎస్పీ 5 స్థానాల్లోనే సక్సెస్ను సొంతం చేసుకుంది. దీంతో జనరల్ ఎలక్షన్లో ఎస్పీ సరిగా సత్తా చాటలేకపోయిందనే సాకు చూపి బీఎస్పీ ఆ పార్టీతో పొత్తుకు గుడ్బై చెప్పింది. బైఎలక్షన్లో సోలోగానే రంగంలోకి దిగుతామని మాయావతి అప్పుడే తేల్చిచెప్పారు.
కొద్దికాలంలోనే కనుమరుగు
ఐదు నెలల తర్వాత జరిగిన ఈ ఉప ఎన్నికల్లో అదే బీఎస్పీకి ఒక్క సీటూ రాలేదు. లోక్సభ ఎన్నికల్లో గ్రాండ్ అలయెన్స్ భారీ విజయం సాధిస్తుందన్న రాజకీయ పండితుల అంచనాలు తలకిందులయ్యాయి. దీంతో కూటమి ఓటమికి బీఎస్పీ ప్రెసిడెంట్ మాయావతి ఎస్పీని తప్పుపట్టారు. అప్పుడు ఆమె చేసిన కామెంట్స్పై ఎస్పీ అధినేత అఖిలేశ్ యాదవ్ మారు మాట్లాడకుండా తన పనేదో తాను చేసుకుపోయారు. పరాజయాల నుంచి పాఠాలు నేర్చుకున్నారు. విమర్శలపై స్పందించకుండా పార్టీని బలోపేతం చేయటంపైనే దృష్టి పెట్టారు.
ఒకే ఒక ర్యాలీతో ఓటర్లను గెలిచారు
బైఎలక్షన్ సందర్భంగా ఒకే ఒక ర్యాలీలో(అదీ ఎస్పీకి కంచుకోట లాంటి రాంపూర్ సెగ్మెంట్లో) పాల్గొన్నారు. ఆయన పార్టీ ఈ సీటుతోపాటు తమకు పట్టున్న జైద్పూర్, జలాల్పూర్లలోనూ పైచేయి సాధించింది. అంబేద్కర్నగర్ జిల్లాలోని జలాల్పూర్లో పోటీ ఆసక్తికరంగా సాగింది. ఇది బీఎస్పీకి సిట్టింగ్ స్థానం. ఎమ్మెల్యే రితేశ్ పాండే లోక్సభకు ఎన్నికవటంతో ఖాళీ అయింది. ఉప ఎన్నికలో బీఎస్పీ, బీజేపీ మధ్యే అసలు పోటీ నెలకొంది. కానీ ఓట్ల కౌంటింగ్ చివరి రౌండ్లకు వచ్చేసరికి ఎస్పీ అభ్యర్థి ఊహించనివిధంగా గెలిచాడు.
సీట్లు, ఓట్లలో సెకండ్ ర్యాంక్ ఎస్పీదే
బైఎలక్షన్లో యోగి పాలనకు పరీక్ష ఎదురైంది.బీజేపీ 8 స్థానాల్ని దక్కించుకుంటే ఐదు చోట్ల గెలిచి ఎస్పీ సెకండ్ ప్లేస్లో నిలిచింది. బీఎస్పీ, కాంగ్రెస్ పార్టీలు 3, 4 స్థానాలకే పరిమితమయ్యాయి. ఈ పార్టీలు చెరో రెండు ప్రాంతాల్లో రెండో స్థానం పొందగలిగాయి. అధికార పార్టీ 35.64 శాతం ఓట్లు పొందగా ఎస్పీకి 22.61 శాతం ఓట్లు వచ్చాయి. ఓట్ల శాతంలో కూడా బీఎస్పీ, కాంగ్రెస్ వెనకబడ్డాయి. బీఎస్పీకి 17.02 శాతం, కాంగ్రెస్కి 11.49 శాతం ఓట్లే వచ్చాయి. లేటెస్ట్ ఉప ఎన్నికల్లో అధికార బీజేపీ ఖాతాలో లక్నో కంటోన్మెంట్, గోవింద్ నగర్, గ్యాంగో, ఘోసి, ప్రతాప్ఘర్, బల్హా, ఇగ్లాస్, మాణిక్పూర్ నియోజకవర్గాలు పడ్డాయి.
బీజేపీని ఢీకొట్టగలిగేది మేమే
బైఎలక్షన్లో బీఎస్పీతో పొత్తు లేకుండా సింగిల్గా పోటీచేయటం మాకే మంచిదైంది. యూపీ ప్రజలు ఇప్పటికీ మా నేత అఖిలేష్ యాదవ్ని అభిమానిస్తున్నారనటానికి ఈ ఎన్నికల ఫలితాలే రుజువు. రాష్ట్రాభివృద్ధికి ఆయన చేసిన కృషిని జనం మర్చిపోలేదు. ఓట్ల రూపంలో చూపించారు. ఉప ఎన్నికల్లో మూడు సీట్లు సాధించి మేమేంటో నిరూపించుకు న్నాం. ఇక, యూపీలో బీజేపీని ఢీకొట్టగలిగేది మేమే. అసెంబ్లీలో అసలైన ప్రతిపక్షం మా పార్టీయే. – జుహీ సింగ్, ఎస్పీ లీడర్
