ఎడపల్లి, వెలుగు: గడిచిన 20 రోజుల్లో బీఆర్ఎస్ ప్రభుత్వం దశాబ్ది ఉత్సవాల పేర ప్రజల సొమ్మును దుర్వినియోగం చేసిందని మాజీ మంత్రి, కాంగ్రెస్నేత సుదర్శన్రెడ్డి దుయ్యబట్టారు. శనివారం ఎడపల్లి మండలంలోని బషీర్ ఫారం వద్ద ఉన్న అలీసాగర్ ఎత్తిపోతల పంప్ హౌస్ ను పరిశీలించారు. అనంతరం విలేకరులతో మాట్లాడారు. తెలంగాణ ప్రభుత్వం వేల కోట్ల ఖర్చుతో ప్రాజెక్ట్లు నిర్మించి, ప్రజలకు సాగునీరు అందిస్తున్నామని పదేపదే చెబుతున్నా.. ఆచరణలో కనిపించడం లేదన్నారు. కాంగ్రెస్ అధికారంలో ఉన్నప్పుడే శ్రీరాంసాగర్, శ్రీశైలం, నాగార్జున సాగర్ లాంటి అనేక ప్రతిష్ఠాత్మక ప్రాజెక్ట్లు నిర్మించినట్లు పేర్కొన్నారు.
ఒక్క కాళేశ్వరం ప్రాజెక్ట్ తో తెలంగాణ మొత్తం నీళ్లందిస్తున్నామని ప్రగల్బాలు పలకడం సరికాదన్నారు. కాంగ్రెస్ హయాంలో నిర్మించిన ప్రాజెక్ట్లకు విస్తరణ, ఆధునీకరణ పేరుతో వేల కోట్లు దుర్వినియోగం చేశారన్నారు. తెలంగాణ ప్రభుత్వం రాష్ట్ర దశాబ్ది ఉత్సవాల కోసం కేటాయించిన రూ.100 కోట్లతో ఒరిగేందేమీ లేదని, కాంగ్రెస్ హయాంలో ఇదే రూ.100 కోట్లతో తాము అలీ సాగర్ ప్రాజెక్ట్నిర్మించి, రైతాంగానికి సాగునీరందించామన్నారు. ఉత్సవాలకు ప్రజల సొమ్ము కాకుండా, వాళ్ల పార్టీ ఫండ్ కేటాయిస్తే బాగుండేదన్నారు. ప్రాజెక్ట్ను సందర్శించిన వారిలో పార్టీ జిల్లా అధ్యక్షుడు మానాల మోహన్ రెడ్డి, లీడర్భాషా మొహైనుద్దీన్ ఉన్నారు.
