నాగర్ కర్నూల్, వెలుగు: నాగర్ కర్నూల్ జిల్లా కల్వకుర్తిలో సీఎం రేవంత్ రెడ్డి పర్యటనకు అన్ని ఏర్పాట్లు పూర్తయ్యాయి. కల్వకుర్తి ఎమ్మెల్యే కసిరెడ్డి నారాయణ రెడ్డి, కలెక్టర్ బాదావత్సంతోష్, అడిషనల్ కలెక్టర్ సీతారామారావు, అధికారులు మూడు రోజులుగా సీఎం పర్యటనకు ఏర్పాట్లను సమీక్షించారు. ఆదివారం సాయంత్రం 4 గంటలకు హెలీకాప్టర్ ద్వారా సీఎం రేవంత్ రెడ్డి కల్వకుర్తికి రానున్నారు. తొలుత కల్వకుర్తి మున్సిపల్ఆఫీస్ పక్కన జరిగే బహిరంగ సభలో పాల్గొంటారు.
అనంతరం హైదరాబాద్ – శ్రీశైలం ప్రధాన రహదారిలోని కొట్ర జంక్షన్ వద్ద కేంద్ర మాజీ మంత్రి దివంగత సూదిని జైపాల్రెడ్డి విగ్రహాన్ని ఆవిష్కరించనున్నారు. జిల్లా ఎస్పీ వైభవ్ గైక్వాడ్, సీనియర్ అధికారులు బందోబస్తును పర్యవేక్షిస్తున్నారు. దాదాపు 20 వేల మంది సీఎం సభకు హాజరవుతారని ఎమ్మెల్యే కసిరెడ్డి నారాయణ రెడ్డి తెలిపారు. ఈ సభలో కల్వకుర్తి నియోజకవర్గానికి సీఎం రేవంత్రెడ్డి నిధులు ప్రకటించే అవకాశం ఉందని పార్టీ వర్గాల తెలిపాయి. పలువురు మంత్రులు, ఉమ్మడి జిల్లాకు చెందిన ఎమ్మెల్యేలు, కార్పొరేషన్ల చైర్మన్లు కార్యక్రమానికి హాజరుకానున్నారు.
