పాలమూరు కాంగ్రెస్ పార్టీలో కలిసిన చేతులు

పాలమూరులో ఏకతాటిపైకి వస్తున్న కాంగ్రెస్ నేతలు
సముచిత స్థానం కల్పిస్తామని హామీ ఇస్తున్న హైకమాండ్
నియోజకవర్గాల్లో క్యాండిడేట్లతో కలిసి క్యాంపెయిన్లో పాల్గొంటున్న లీడర్లు

మహబూబ్నగర్, వెలుగు: పాలమూరు కాంగ్రెస్ పార్టీలో అసంతృప్తితో ఉన్నలీడర్లంతా ఒక్కతాటి పైకి వస్తున్నారు. ఆయా అసెంబ్లీ సెగ్మెంట్ల నుంచి వీరంతా టికెట్ల కోసం పోటీ పడగా.. హైకమాండ్ రిలీజ్ చేసిన లిస్టుల్లో వీరి పేర్లు లేకపోవడంతో కొద్ది రోజులుగా నారాజ్లో ఉన్నారు. అయితే నాలుగు రోజుల నుంచి వీరు సెగ్మెంట్లలో హైకమాండ్ ప్రకటించిన క్యాండిడేట్లకు అనుకూలంగా తమ అనుచరులతో కలిసి సమావేశాలు నిర్వహిస్తున్నారు. సమావేశాలకు క్యాండిడేట్లను చీఫ్ గెస్టులుగా పిలిచి అండగా ఉంటామంటూ చేతులు కలుపుతున్నారు. మరికొందరు లీడర్లు పార్టీ స్టేట్ చీఫ్ రేవంత్రెడ్డి వద్దకు వెళ్లి క్యాండిడేట్లకు సపోర్ట్గా ఉంటామని హామీ ఇస్తున్నారు.

రంగంలోకి రేవంత్రెడ్డి..

మహబూబ్నగర్ అసెంబ్లీ సెగ్మెంట్ నుంచి పోటీ చేసేందుకు బీసీ సామాజిక వర్గానికి చెందిన లీడర్ ఎన్పీ వెంకటేశ్ ప్రయత్నాలు చేశారు. తనకే టికెట్ వస్తుందన్న నమ్మకంతో కొంత కాలం పబ్లిక్లో తిరిగారు. అయితే, హైకమాండ్ మాజీ ఎమ్మెల్యే యెన్నం శ్రీనివాస్రెడ్డికి సెకండ్ లిస్ట్లో టికెట్ కన్ఫాం చేసింది. ఈ క్రమంలో కొద్ది రోజులు పార్టీ కార్యక్రమాలకు ఎన్పీ దూరంగా ఉంటున్నారు. ఈ విషయం హైకమాండ్ దృష్టికి వెళ్లడంతో పీసీసీ చీఫ్ రేవంత్రెడ్డి రంగంలోకి దిగారు. వైఎస్ఆర్తో పాటు ఎన్పీని శుక్రవారం హైదరాబాద్కు పిలిపించుకున్నారు. మహబూబ్నగర్ పరిస్థితులు తనకు పూర్తిగా తెలుసుని, అందరూ కలిసిగెలుపు కోసం పని చేయాలని కోరారు. వీరి వెంట వచ్చిన ఆనంద్ గౌడ్, ఎస్ఏ వినోద్కు కూడా ఇదే సూచించారు. ‘మీ భవిష్యత్కు పూచీ నాదే’ అంటూ వారికి హామీ ఇచ్చారు. దీంతో శనివారం నిర్వహించిన ఎలక్షన్ క్యాంపెయిన్లో అందరూ కలిసి పాల్గొన్నారు.

సమావేశాలు.. తీర్మానాలు..

మక్తల్ స్థానం కోసం కాంగ్రెస్ పార్టీ నుంచి ఎక్కువ మంది పోటీ పడ్డారు. ఇందులో నాగరాజు గౌడ్, ప్రశాంత్రెడ్డి, పోలీస్ చంద్రశేఖర్రెడ్డి, బాలకిష్టారెడ్డి, వాకిటి శ్రీహరి, సీతాదయాకర్రెడ్డి టికెట్ కోసం అప్లై చేసుకున్నారు. హైకమాండ్ మాత్రం ఆ పార్టీ డీసీసీ అధ్యక్షుడు, బీసీ లీడర్ శ్రీహరికి టికెట్ కన్ఫాం చేసింది. దీంతో టికెట్ ఆశించిన లీడర్లంతా అసంతృప్తిలో ఉన్నారు. అయితే, నాలుగు రోజుల కింద దేవరకద్ర మాజీ ఎమ్మెల్యే సీతా దయాకర్రెడ్డి తమ అనుచరులతో మక్తల్లో సమావేశం నిర్వహించారు. సమావేశానికి శ్రీహరిని ఆహ్వానించి అందరూ శ్రీహరికే సపోర్ట్ చేయాలని తీర్మానించారు. మూడు రోజుల కింద బీకేఆర్ ఫౌండేషన్ అధినేత బాలకిష్టారెడ్డి కూడా తన వర్గంతో సమావేశం ఏర్పాటు చేశారు. శ్రీహరిని సమావేశానికి ఆహ్వానించిప్రతి ఒక్కరి సపోర్ట్ శ్రీహరికే ఉంటుందని హామీ ఇచ్చారు. శనివారం నర్వ మండలంలో జరిగిన ఎన్నికల క్యాంపెయిన్లో శ్రీహరితో కలిసి సీతాదయాకర్రెడ్డి, బాలకిష్టారెడ్డితో పాటు నాగరాజుగౌడ్, పోలీస్ చంద్రశేఖర్రెడ్డి పాల్గొనడం విశేషం. మరో లీడర్ ప్రశాంత్రెడ్డితో కూడా పార్టీ హైకమాండ్ చర్చలు జరిపింది. ఈయన కూడా తన అనుచరులతో సమావేశమై తర్వాత హైదరాబాద్ వెళ్లారు. శనివారం నుంచి శ్రీహరికి సపోర్ట్గా ఎన్నికల క్యాంపెయిన్లో పాల్గొన్నారు.

మద్దతులు.. చేరికలు..

దేవరకద్ర సీటు కోసం మహబూబ్నగర్ డీసీసీ అధ్యక్షుడు జి.మధుసూదన్రెడ్డి (జీఎంఆర్)తో పాటు ప్రదీప్కుమార్గౌడ్, కొండా ప్రశాంత్రెడ్డి ప్రయత్నం చేశారు. కానీ, సెకండ్ లిస్టులో హైకమాండ్ జీఎంఆర్కు టికెట్ కన్ఫాం చేసింది. దీంతో ఓ సందర్భంలో తనకు టికెట్ రాలేదని ఇండిపెండెంట్గా పోటీ చేస్తానని ప్రశాంత్ సంకేతాలు ఇచ్చారు. అయితే, స్వయంగా జీఎంఆర్ రంగంలోకి దిగి, ప్రశాంత్తో చర్చలు జరుపడంతో ఇష్యూ సద్దుమణిగింది. అలాగే ప్రధాన పార్టీలకు చెందిన గ్రామ, మండల స్థాయి లీడర్లు పెద్ద మొత్తంలో జీఎంఆర్ సమక్షంలో పార్టీలో చేరుతుండటం కలిసొచ్చే అంశంగా రాజకీయ విశ్లేషకులు పేర్కొంటున్నారు. దేవరకద్ర మాజీ ఎమ్మెల్యే సీతా దయాకర్రెడ్డి కాంగ్రెస్ పార్టీలోనే ఉండడం, ఈ ఎన్నికల్లో జీఎంఆర్కు సపోర్ట్గా ఆమె ఉంటున్నారనే చర్చ జరుగుతోంది. పలు పార్టీల నుంచి దేవరకద్ర స్థానం కోసం సంప్రదింపులు జరిపిన ఓ ఆఫీసర్ కూడా జీఎంఆర్కు బ్యాక్ సపోర్ట్గా ఉన్నట్లు తెలిసింది.

మిగతా నియోజకవర్గాల్లో..

దాదాపు రెండు నెలలుగా జడ్చర్ల, నారాయణపేట అసెంబ్లీ స్థానాల్లో టికెట్లపై సస్పెన్స్ కొనసాగింది. సెకండ్ లిస్ట్ ప్రకటన తర్వాత ఈ రెండు స్థానాలకు తనకు ఎక్కడా టికెట్ రాలేదని ఎర్ర శేఖర్ బీఆర్ఎస్లోకి వెళ్లిపోయారు. దీంతో కాంగ్రెస్ క్యాడర్ మొత్తం ఒకే తాటిపై నిలిచింది. అప్పటి వరకు జడ్చర్లలో రెండు గ్రూపులుగా ఉన్న పార్టీ.. ఒక్కటవ్వడంతో ఆ పార్టీ జడ్చర్ల క్యాండిడేట్ జనంపల్లి అనిరుధ్రెడ్డికి బెనిఫిట్ అయ్యింది. నారాయణపేటలోనూ పర్ణికారెడ్డికి ఇదే విషయం అనుకూలంగా మారింది.

అలాగే కొద్ది రోజుల కింద కొల్లాపూర్ టికెట్ ఆశించిన జగదీశ్వర్రావు టికెట్ రాలేదనే బాధతో ఫార్వర్డ్ బ్లాక్లో చేరినా.. మరుసటి రోజే హైకమాండ్ మాట్లాడి తగిన ప్రియారిటీ ఇస్తామని హామీ ఇవ్వడంతో తిరిగి పార్టీలో చేరారు.