జనగామ అర్బన్, వెలుగు : అధికారులందరూ సమన్వయంతో పనిచేయాలని జనగామ జిల్లా కలెక్టర్ షేక్ రిజ్వాన్ బాషా అన్నారు. సోమవారం కలెక్టరేట్లోని కాన్పరెన్స్ హాల్లో జిల్లా అధికారులతో అడిషనల్ కలెక్టర్లు పర్మర్ పింకేశ్ కుమార్, రోహిత్ సింగ్ లతో కలిసి రివ్యూ నిర్వహించారు. సీఎం ప్రజాదర్బార్ వెబ్సైట్లో జనగామ జిల్లా నుంచి 450 దరఖాస్తులు పెండింగ్లో ఉన్నాయన్నారు. ఈ మేరకు ప్రజావాణిలో వచ్చే ఫిర్యాదులు సంబంధిత శాఖల అధికారులు వేంటనే పరిష్కరించాలని ఆదేశించారు. ప్రజావాణి పరిష్కారంలో జనగామ జిల్లా 5వ స్థానానికి చేరుకునేలా అధికారులందరూ కృషి చేయాలని సూచించారు. కలెక్టరేట్లో పారశుధ్ద్యం, మొక్కల పెంపకంపై అధికారులతో కమిటీ ఏర్పాటు చేసి పరిశుభ్రతకు పచ్చదనానికి కృషి చేయాలని పిలుపునిచ్చారు.
మండల పరిధిలో ఏ సమస్య తలెత్తిన జిల్లా అధికారులు ఫీల్డ్ విజిట్ చేసి సమస్యలను త్వరితగతిన పూర్తి చేయాలని అన్నారు. పార్లమెంట్ ఎన్నికలలో అధికారులు సమన్వయంతో పనిచేయాలని అన్నారు. అనంతరం ఏర్పాటు చేసిన జిల్లా స్కిల్ కమిటీ మీటింగ్లో ఆయన మాట్లాడారు. నిరుద్యోగ యువతకు స్కిల్ డెవలప్మెంట్ లో శిక్షణ ఇచ్చి వారికి ఉపాధి అవకాశాలు కల్పించడమే లక్ష్యంగా ఈ ప్రాజెక్టు సంకల్పమని పేర్కొన్నారు. ఈ కార్యక్రమంలో ఎంప్లాయ్మెంట్ ఆఫీసర్ ఉమారాణి, వివిధ శాఖల జిల్లా అధికారులు తదితరులు పాల్గొన్నారు.
