భద్రాద్రికొత్తగూడెం, వెలుగు : కొత్తగూడెం నియోజకవర్గం నుంచి పోటీ చేసేందుకు ఆయా పార్టీల లీడర్లు రెడీ అవుతున్నారు. సీపీఐ నుంచి పార్టీ స్టేట్సెక్రెటరీ కూనంనేని సాంబశివరావు సిద్ధమవుతుండగా , మాజీ ఎమ్మెల్యే జలగం వెంకట్రావ్ ఏదో ఓ పార్టీ నుంచిగానీ లేదంటూ ఇండిపెండెంట్గా పోటీ చేసే ఆలోచనలో ఉన్నారు. కాంగ్రెస్, బీజేపీలు ఇంకా క్యాండిడేట్లను ప్రకటించలేదు. బీఆర్ఎస్ క్యాండిడెట్గా ఎమ్మెల్యే వనమా వెంకటేశ్వరరావును పార్టీ హైకమాండ్ ప్రకటించింది.
కొత్తగూడెం నుంచి పోటీ చేసుడే..
కాంగ్రెస్తో వామపక్షాలు పొత్తు పెట్టుకునే అవకాశాలున్నాయని ఆ పార్టీ నేతలు చెప్తున్నారు. కాంగ్రెస్తో పొత్తు ఉన్నా లేకున్నా సీపీఎం, టీడీపీ, జనసేనతో కలిసి పోటీ చేసేందుకు కూనంనేని సన్నద్ధం అవుతున్నారు. ఈ క్రమంలోనే జిల్లాలో ఆందోళనలు చేస్తున్న వారి వద్దకు వెళ్లి మద్దతు తెలుపుతున్నారు. వినాయక చవితి ఉత్సవాల్లోనూ కూనంనేని పాల్గొన్నారు. మరోవైపు బీఆర్ఎస్ నేత జలగం వెంకట్రావ్ పోటీకి ప్లాన్ చేస్తున్నారు. ఇటీవల ఎమ్మెల్యేగా వనమాపై అనర్హత వేటు వేస్తూ, జలగం వెంకట్రావ్ను ఎమ్మెల్యేగా కొనసాగించాలని కోర్టు తీర్పు ఇచ్చింది. దీనిపై వనమా సుప్రీం కోర్టుకు వెళ్లారు. ఈ నెల 10న కోర్టు తీర్పు రానుంది. వనమాపై అనర్హత వేటు వేస్తే జలగం ఎమ్మెల్యేగా కొనసాగే అవకాశం ఉంది. వనమాపై అనర్హత వేటుపడితే ఆ స్థానంలో బీఆర్ఎస్ నుంచి పోటీ చేసేందుకు స్టేట్ హెల్త్ డైరెక్టర్ గడల శ్రీనివాసరావు సిద్ధంగా ఉన్నారు. ఇప్పటికే టికెట్ కోసం ఆయన ప్రయత్నిస్తున్నారు. మరోవైపు ఎంపీ వద్దిరాజు రవిచంద్ర పేరును పరిశీలనలో ఉందనే ప్రచారం పార్టీలో కొనసాగుతోంది. ఒకవేళ సీటు కేటాయించకపోతే ఏదైనా పార్టీ నుంచి లేదా ఇండిపెండెంట్గానైనా జలగం పోటీ చేసే అవకాశాలున్నాయని అనుచరులు పేర్కొంటున్నారు. వనమాపై కోర్టు తీర్పు తర్వాత జలగం తాను పోటీ చేసే విషయమై స్పష్టత ఇస్తారని అనుచరులు చెప్తున్నారు.
కాంగ్రెస్లో ఉత్కంఠ..
కాంగ్రెస్ క్యాండిడేట్పై పార్టీ క్యాడర్లో ఎడతెగని ఉత్కంఠ నెలకొంది. మాజీ ఎంపీ, టీపీసీసీ ఎన్నికల కమిటీ కో కన్వీనర్ పొంగులేటి శ్రీనివాస్ రెడ్డి పోటీ చేస్తారనే ప్రచారం జరుగుతోంది. ఒకవేళ పొంగులేటి పాలేరు, ఖమ్మం నుంచి పోటీ చేయాల్సి వస్తే కొత్తగూడెం నుంచి మాజీ ఎమ్మెల్సీ పోట్ల నాగేశ్వరావు, ఎడవల్లి కృష్ణ, నాగసీతారాములు, పొంగులేటి ప్రధాన అనుచరుడైన వూకంటి గోపాల్రావు ప్రధానంగా టికెట్ రేసులో ఉన్నారు. పోట్ల నాగేశ్వరరావు, ఎడవల్లి కృష్ణ, నాగసీతారాములు ఎవరికి వారు టికెట్ తనకే కన్ఫర్మ్ అయిందంటూ ప్రచారం చేసుకుంటున్నారు. పార్టీ ప్రోగ్రాంలను ఎవరికి వారు చేపడుతున్నారు. బీజేపీ నుంచి కొత్తగూడెం టికెట్ఆశిస్తూ దాదాపు 12 మందికి పైగా దరఖాస్తు చేసుకున్నారు. బీఎస్పీ నుంచి యెర్రా కామేశ్ పోటీ చేయనున్నట్టు ఆ పార్టీ స్టేట్ చీఫ్ ఆర్ఎస్ ప్రవీణ్ కుమార్ ఇప్పటికే ప్రకటించారు. ఎన్నికల ప్రచారాన్ని ముమ్మరం చేసేందుకు సిద్ధమవుతున్నారు.
