స్టూడెంట్లు, నిరుద్యోగుల అకౌంట్లలోకి ఎన్ఆర్ఈజీఎస్​ ఫండ్స్​

• నారాయణపేట జిల్లాలో రూ.2.37 కోట్ల అక్రమాలు
• కలెక్టర్​కు గ్రామస్తుల కంప్లైంట్
• కన్మనూరు ఫీల్డ్​ అసిస్టెంట్, ఏపీవో సస్పెన్షన్

మహబూబ్​నగర్/నారాయణపేట, వెలుగు: నారాయణపేట జిల్లాలో ఎన్ఆర్ఈజీఎస్​ ఫండ్స్​ పక్కదారి పట్టినట్లు ఆరోపణలు వస్తున్నాయి. మరికల్​ మండలం కన్మనూరు గ్రామానికి చెందిన ఫీల్డ్​ అసిస్టెంట్​ మతీన్, పై స్థాయి ఆఫీసర్లతో కలిసి అవినీతికి పాల్పడినట్లు తెలిసింది. చేయని పనులు చేసినట్లు బిల్లులు, రికార్డులు సృష్టించడంతో పాటు స్టూండెంట్లు, నిరుద్యోగుల పేర్ల మీద జాబ్​ కార్డులు జారీ చేసి నిధులు దండుకున్నట్లు తెలిసింది. ఇలా మూడేండ్లుగా రూ.2.37 కోట్లు అక్రమాలకు పాల్పడ్డారని నారాయణపేట కలెక్టర్​కు ఫిర్యాదులు అందాయి.

71 పనుల్లో అక్రమాలు!

మతీన్​ గతం నుంచి ఇక్కడ పని చేసిన అధికారులతో సఖ్యతగా ఉండేవాడు. వారి సహకారంతో అక్రమాలకు తెరలేపాడు. వచ్చిన దాంట్లో కొంత ఆఫీసర్లకు కూడా ముట్టజెప్పేవాడని తెలిసింది. ప్రధానంగా ఎన్ఆర్ఈజీఎస్​లో కాంపోనెంట్​వర్క్​ కింద కూలీలకు చెల్లించాల్సిన పేమెంట్లను స్టూడెంట్లు, నిరుద్యోగుల అకౌంట్లలోకి.. మెటీరియల్​ కాంపోనెంట్​ కింద చెల్లించే పేమెంట్లను జీపీ అకౌంట్లలోకి కాకుండా నేరుగా తన సొంత అకౌంట్లలోకి మళ్లించుకున్నట్లు తెలిసింది.

 ప్రధానంగా కోయిల్​సాగర్, మన్నెవాగు, తదితర కాలువల కట్టలు పెంచడం, క్యాటిల్​ షెడ్లు, నీటి నిల్వ చెరువులు, అవెన్యూ ప్లాంటేషన్, అగ్రికల్చర్​ గోడౌన్, వర్క్​ ఫెడ్లు, విలేజ్​ పార్క్, రూఫ్  టాప్​ రెయిన్​ వాటర్​ హార్వెస్టింగ్​ వర్కులు, కల్లాల నిర్మాణం, కంపోస్ట్​ పిట్లు, కిచెన్​ కం స్టోర్లు, శ్మశానవాటికలు వంటి 71 పనుల్లో రూ.2.37 కోట్ల అక్రమాలకు పాల్పడినట్లు కలెక్టర్​కు అందిన కంప్లైంట్​లో ఉన్నాయి. దీనిపై విచారణ చేసిన ఆఫీసర్లు 57 రకాల పనుల్లో అక్రమాలు జరిగినట్లు అంచనాకు వచ్చారు. ప్రస్తుతం ఈ వ్యవహారంలో ఇద్దరిని సస్పెండ్​ చేశారు. 

జాబ్​ కార్డులు సృష్టించి..

ఎన్ఆర్ఈజీఎస్​ గైడ్​ లైన్స్​ ప్రకారం ఒక కుటుంబంలో ఒకరికే జాబ్​ కార్డు ఇవ్వాలి. కానీ, మతీన్​ తనకు తెలిసిన వారందరికీ జాబ్​ కార్డులు ఇప్పించినట్లు తెలిసింది. గ్రామానికి చెందిన యువకులు హైదరాబాద్​లో చదువుకుంటుండగా, వారి పేర్ల మీద, గ్రామంలో ఖాళీగా ఉండే వారి పేర్ల మీద జాబ్​ కార్డులు తీయించినట్లు తెలిసింది. వాస్తవానికి ఆ గ్రామ పంచాయతీ సెక్రటరీ ఈ పనులు చేయాల్సి ఉండగా.. ఆయనకు తెలియకుండానే ఉన్నాధికారుల సహకారంతో ఇష్టం వచ్చిన వారి పేర్ల మీద జాబ్​ కార్డులు సృష్టించారు. అంతటితో ఆగకుండా స్కీమ్​లో వీరు కూలీ పనులు చేయకున్నా.. చేసినట్లు బిల్లులు చేసి వారి అకౌంట్లలోకి డబ్బులు వేశారు. ఆ తర్వాత వారి నుంచి ఆన్​లైన్​ పేమెంట్ల ద్వారా తిరిగి తన అకౌంట్​లోకి డబ్బులు వేయించుకున్నాడు. ఇందుకు సంబంధించిన స్ర్కీన్​ షాట్లు కూడా కలెక్టర్​కు అందించిన కంప్లైంట్​లో ఉన్నాయి.

ఇంట్లోనే రికార్డులు..

కన్మనూరు గ్రామానికి చెందిన ఉపాధి హామీ పథకానికి సంబంధించిన రికార్డులు మరికల్​ ఎంపీడీవో ఆఫీసులో ఉండాల్సి ఉండగా.. కొంత కాలంగా మతీన్​ తన ఇంటి వద్దనే ఉంచుకున్నాడనే ఆరోపణలున్నాయి. దాదాపు నాలుగైదు ఏండ్ల నుంచి ఇదే తంతు కొనసాగినట్లు సమాచారం.

 అయితే కన్మనూరు గ్రామానికి చెందిన కొందరు యువకులు మతీన్​ తీరుపై అనుమానం వచ్చి గ్రామ పంచాయతీలో ఉపాధి హామీ పథకం కింద చేసిన పనులు, వాటి వివరాలు సమాచార హక్కు చట్టం ద్వారా ఇవ్వాలని అప్లికేషన్​ పెట్టుకున్నారు. దీంతో అలర్ట్​ అయిన ఆఫీసర్లు వెంటనే రికార్డులు అప్పగించాలని మతీన్​ను ఆదేశించడంతో అప్పటికప్పుడు ఆయన మండల ఆఫీసులో రికార్డులు అందజేసినట్లుతెలిసింది.

ALSO READ : అర్జీలను వెంటనే పరిష్కరించి ప్రజల్లో నమ్మకం కల్పించాలి

పూర్తి వివరాలు సేకరిస్తున్నాం..

కన్మనూరులో 71 వర్క్స్​​ఐడీల మీద అక్రమాలు జరిగాయని కంప్లైంట్లు వచ్చాయి. వర్క్​ ఐడీల్లో కొన్ని ఒకే రకంగా​ఉన్నాయి. 57 వర్క్​ ఐడీలను తేల్చాము. ఇందులో కొన్ని వర్క్స్​ జరిగాయి. హైదరాబాద్, ఇతర ప్రాంతాల్లో ఉన్న వారికి డబ్బులు వేశారు. దీనిపై సమగ్ర విచారణ జరుపుతున్నాం. ఎవరెవరి పీరియడ్​లో అక్రమాలు జరిగాయనే విషయాన్ని తేల్చుతాం. అనంతరం నిధులను రికవరీ చేస్తాం. పూర్తి రిపోర్డ్​ వచ్చాక బాధ్యులపై చర్యలు తీసుకుంటాం. ప్రస్తుతం కన్మనూరు ఫీల్డ్​ అసిస్టెంట్​ మతీన్, గతంలో ఇక్కడ ఏపీవోగా పని చేసిన చంద్రశేఖర్​ ను సస్పెండ్​ చేశాం.–మొగులప్ప, డీఆర్డీవో, నారాయణపేట