- రాష్ట్ర ప్రభుత్వంతో ఎంవోయూ చేసుకున్న సంస్థ
- 500 మందికి ఉపాధి: మంత్రి శ్రీధర్ బాబు
హైదరాబాద్, వెలుగు: ఆటోమోటివ్, ఎలక్ట్రిక్ వెహికల్స్లో వాడే మ్యాగ్నెటిక్, సెన్సర్లు, చిప్లను తయారు చేసే దిగ్గజ సంస్థ అలెగ్రో మైక్రోసిస్టమ్స్ హైదరాబాద్లో పరిశోధన, అభివృద్ధి (ఆర్ అండ్ డీ) సెంటర్ను ఏర్పాటు చేసేందుకు ముందుకొచ్చింది. శుక్రవారం సెక్రటేరియెట్లో మంత్రి శ్రీధర్బాబుతో సంస్థ ప్రతినిధులు ఎంవోయూ చేసుకున్నారు. అనంతరం మంత్రి శ్రీధర్బాబు మాట్లాడారు.
సంస్థ ఆర్ అండ్ సెంటర్ ఏర్పాటుతో 500 మంది ప్రతిభావంతులకు ఉద్యోగాలు లభిస్తాయని చెప్పారు. రాష్ట్రంలో పరిశ్రమల ఏర్పాటుకు అనుకూలమైన వాతావరణం ఉండడంతో సంస్థ హైదరాబాద్లో ఆర్ అండ్ డీ సెంటర్ను ఏర్పాటు చేయాలని నిర్ణయించిందన్నారు. సంస్థకు ప్రభుత్వం అన్ని రకాలుగా సహకరిస్తుందని హామీ ఇచ్చారు. అల్లెగ్రో రాకతో రాష్ట్రంలో సెమీకండక్టర్ చిప్ల తయారీ పరిశ్రమకు ఊతం లభిస్తుందని ఆయన పేర్కొన్నారు.
ఎలక్ట్రిక్ వెహికల్స్ సిగ్నల్ డిజైన్, వెరిఫికేషన్, వ్యాలిడేషన్ తోపాటు రోబోటిక్ ఆటోమేషన్ లో కూడా అలెగ్రో చిప్ లను రూపొందిస్తుందని చెప్పారు. బీఎండబ్ల్యూ ఎలక్ట్రిక్ కార్ల తయారీ సంస్థతో పాటు ఈవీ రంగంలో బ్యాటరీల నిర్వహణ, పవర్ చిప్ ల తయారీలో ఈ సంస్థ అగ్రగామిగా ఉందన్నారు. కార్యక్రమంలో అలెగ్రో మైక్రోసిస్టమ్స్ సీఈవో వినీత్ నర్గోల్వాలా, సీనియర్ వైస్ ప్రెసిడెంట్లు సుమన్ నారాయణ్, మ్యాక్స్ గ్లోవర్ పాల్గొన్నారు.
