న్యూఢిల్లీ: హర్యానాలో ఆప్తో పొత్తుకు కాంగ్రెస్ మాజీ చీఫ్ రాహుల్ గాంధీ ఆసక్తి కనబర్చారనే వార్తలను ఆప్ నేత, రాజ్యసభ ఎంపీ సంజయ్ సింగ్ స్వాగతించారు. సోమవారం జరిగిన కాంగ్రెస్ సెంట్రల్ ఎలక్షన్ కమిటీ (సీఈసీ ) సమావేశంలో ఆప్తో భాగస్వామ్యాన్ని పరిశీలించాలని రాహుల్ కోరారని వార్తలు వెలువడంతో ఆయన ఈ వ్యాఖ్యలు చేశారు. మంగళవారం సంజయ్ సింగ్ మీడియాతో మాట్లాడారు. ‘‘సామాన్యులు, రైతులు, యువతకు వ్యతిరేకంగా పని చేస్తున్న బీజేపీని ఓడించడమే మా ప్రాధాన్యత.
కాంగ్రెస్తో పొత్తుకు సంబంధించినంత వరకు కేజ్రీవాల్ విడుదలైన తర్వాతే తుది నిర్ణయం ఉంటుంది” అని తెలిపారు. ఇటీవల హర్యానా కాంగ్రెస్ సీనియర్ నేత కుమారి షెల్జా మాట్లాడుతూ.. అసెంబ్లీ ఎన్నికల్లో ఆప్తో పొత్తును కొట్టిపారేశారు. రాష్ట్రంలో కాంగ్రెస్ బలంగా ఉందని పార్టీ సొంతంగా బరిలోకి దిగుతుందని చెప్పారు. కాగా, హర్యానాలో ఆప్తో పొత్తు ఖరారు కాలేదని చర్చలు జరుగుతున్నాయని కాంగ్రెస్ తెలిపింది. మంగళవారం ఏఐసీసీ రాష్ట్ర ఇన్చార్జ్ జనరల్ సెక్రటరీ దీపక్ బబారియా దీనిపై క్లారిటీ ఇచ్చారు.
