పంజాబ్కు చెందిన అమర్ కౌర్.. చాలా ఫేమస్ యూట్యూబర్. అంత ఫేమస్ ఎందుకు అయ్యిందంటే.. మనవళ్లు, మనవరాళ్లతో ఆడుకోవాల్సిన వయసులో కూడా కష్టపడి పని చేస్తోంది. వారంలో ఒక్కసారైనా దాదాపు వంద మంది స్కూల్ పిల్లలకు వంట చేసి ఫుడ్ పెడుతుంది. అందుకే ఆమెని ఎంతోమంది ఆదర్శంగా తీసుకుంటున్నారు. ఆమె పిల్లలంతా సెటిల్ అయ్యారు. మనవలు కూడా పెద్దవాళ్లు అయ్యారు. ఖాళీగా ఉండలేక ఆమె కూడా తన మనవడు హర్దీప్ శర్మతో కలిసి యూట్యూబ్ చానెల్ మొదలుపెట్టింది. మొదట్లో ఒక చిన్న కట్టెల పొయ్యి మీద ఒక కుటుంబానికి సరిపడా వంట చేసేది.
అయితే, ఆమె వంట చేసే విధానం వల్ల ఎంతోమందిని ఆకట్టుకుంది. దాంతో ఛానెల్కు బాగా రీచ్ వచ్చింది. అలా కొన్నాళ్లకు చానెల్ డెవలప్ అవుతున్న కొద్దీ వంటకాల క్వాంటిటీ పెరుగుతూ వచ్చింది. ఇప్పుడు పెద్ద పెద్ద పొయ్యిల మీద ఒకేసారి దాదాపు వందమందికి వంట చేస్తోంది. పెద్ద మొత్తంలో వంట చేయడానికి ఇంటి వెనకాల అన్ని ఏర్పాట్లు చేయించింది. ఆమె వండిన ఫుడ్ని వాళ్ల ఊళ్లోనే ఉన్న ఒక గవర్నమెంట్ స్కూల్లో పిల్లలకు పెడుతుంటారు.
అయితే.. వీడియోలు చేయడం మొదలుపెట్టి ఇప్పటికి దాదాపు ఎనిమిదేండ్లు అయ్యింది. అప్పటినుంచి ఇప్పటివరకు ఆమె చేసినవన్నీ వెజ్ వంటకాలే. అయినా.. చానెల్కు రీచ్ ఏమాత్రం తగ్గడంలేదు. నాన్వెజ్ వంటకాలను ఇష్టపడేవాళ్లు కూడా అమర్ వీడియోలను చూస్తుంటారు. ఈ మధ్యే మనవడు హర్దీప్ శర్మతో కలిసి ఒక రెస్టారెంట్ కూడా పెట్టింది. దాని పేరు కూడా ‘వెజ్ విలేజ్ ఫుడ్’ అనే పెట్టారు. ఇప్పటివరకు వంటకాల వీడియోలు మాత్రమే పంచుకునేది. ఇప్పుడు తన రెసిపీల రుచులను కూడా అందరికీ పంచుతోంది. అమర్ ఆరెస్టారెంట్లో పనిచేయకపోయినా అక్కడ వంటలు మాత్రం ఆమె గైడెన్స్లోనే చేస్తుంటారు.
వయసు ఏడు పదులు దాటింది. అయినా..వంద మంది పిల్లలకు ఈజీగా వండి పెడుతుంది ఈ పంజాబీ బామ్మ అమర్ కౌర్. ఈ వయసులోనూ ఇన్ఫ్లుయెన్సర్గా మారి లక్షల మంది అభిమానాన్ని సంపాదించుకుంది. ఆకలితో ఉన్న పిల్లల కడుపులు నింపుతూ ఎంతోమంది ప్రేమని దక్కించుకుంది. అంతేకాదు.. ఈ తరం నచ్చే కొత్త వంటకాలతోపాటు అన్ని తరాలు మెచ్చే పాత వంటకాలను యూట్యూబ్ ద్వారా అందరికీ నేర్పుతోంది.
అరుదుగా మాట్లాడుతుంది
అమర్ కౌర్ తన వీడియోల్లో చాలా అరుదుగా మాట్లాడుతుంటుంది. ఆమెతో పాటు వీడియోల్లో తన మనవడు కూడా కనిపిస్తుంటాడు. అతను మాట్లాడేది కూడా తక్కువే. వీడియోల్లో మనసుకు ప్రశాంతతని ఇచ్చే ఏఎస్ఎంఆర్ సౌండ్స్ ఎక్కువగా ఉంటాయి. మాట్లాడకపోయినా వంట వండే విధానం మాత్రం చాలా బాగా చూపిస్తుంటుంది. ఇక్కడ మరో ప్రత్యేకత ఏంటంటే.. ఇప్పటికీ అన్ని వంటకాలు కట్టెల పొయ్యిల మీదే చేస్తున్నారు.
ఛానెల్ ఇలా..
‘వెజ్ విలేజ్ ఫుడ్ ఛానెల్’ని 2014లోనే పెట్టారు. కానీ.. 2017 నుంచి వీడియోలు పోస్ట్‌ చేస్తున్నారు. వీడియో లను షూట్ చేయడం నుంచి ఎడిటింగ్, ప్రమోషన్ల తోసహా చానెల్కు సంబంధించిన అన్నింటినీ హర్దీప్ శర్మ చూసుకుంటున్నాడు. అప్పుడప్పుడు అతని కజిన్స్, మేనమామలు సాయం చేస్తుంటారు. ప్రస్తుతం చానెల్‌‌‌‌ను 6.17 మిలియన్ల మంది సబ్స్క్రయిబ్ చేసుకున్నారు. ఇప్పటివరకు చానెల్‌‌‌‌లో 596 వీడియోలు అప్లోడ్ చేశారు. వాటిలో వెయ్యి సమోసాలు చేసిన ఒక వీడియో కు ఏకంగా 147 మిలియన్ల వ్యూస్ వచ్చాయి. అంతేకాదు.. ఆమె చానెల్‌‌‌‌లో పది మిలియన్ల వ్యూస్ దాటిన వీడియోలు చాలానే ఉన్నాయి. పెద్ద వీడియోలతోపాటు షార్ట్‌ వీడియోలకు బాగా రీచ్ వస్తోంది.
