హైదరాబాద్ సిటీ/ పంజాగుట్ట, వెలుగు: బెంగళూరు నుంచి డ్రగ్స్ తీసుకొచ్చి సిటీలో అమ్ముతున్న నలుగురిని అమీర్పేట ఎక్సైజ్ పోలీసులు అరెస్ట్ చేశారు. నిందితుల నుంచి 6.65 గ్రాముల ఎండీఎంఏ డ్రగ్స్, 2.27 గ్రాముల ఓజీ గంజాయి, 8.57 గ్రాముల హాష్ ఆయిల్, ఒక బైక్ స్వాధీనం చేసుకున్నారు. కేరళకు చెందిన సంజయ్, శ్రీజిత్, ఆదర్శ్ కలిసిఅమీర్పేటలోని కార్ఫ్1 గ్లోబల్ సొల్యూషన్ కంపెనీలో పనిచేస్తూ.. సత్యం థియేటర్ రోడ్డులోని ఓ హాస్టల్లో ఉంటున్నారు. వీరికి న్యూ బోయినపల్లికి చెందిన అజయ్తో పరిచయం ఏర్పడింది.
అప్పటికే వీరంతా డ్రగ్స్కు బానిసలు కావడంతో ఈజీమనీ కోసం డ్రగ్స్అమ్మాలని ప్లాన్ చేశారు. బెంగళూరు నుంచి శ్రీజిత్, ఆదర్శ్, సంజయ్ సిటీకి డ్రగ్స్ తెస్తుండగా, అజయ్ వీటిని అమ్ముతున్నాడు. విశ్వసనీయ సమాచారంతో అమీర్పేటలో మంగళవారం వీరిని అదుపులోకి తీసుకున్నారు. బుధవారం వీరిని అరెస్ట్ చేసి, రిమాండ్కు తరలించినట్లు ఎక్సైజ్ సీఐ పటేల్ బానోత్ తెలిపారు.
