అమెరికా ప్రెసిడెంట్ డొనాల్డ్ ట్రంప్కి అద్దిరిపోయే పంచ్ పడింది. డెన్మార్క్ పరిధిలోని గ్రీన్లాండ్ దీవిని కొనాలనుకుంటున్నట్లు ఆయన రీసెంట్గా స్టేట్మెంట్ ఇచ్చిన విషయం తెలిసిందే కదా. దానికి డెన్మార్క్ మొదట్లో కూల్గానే రియాక్ట్ అయింది. ‘గ్రీన్లాండ్ను సొంతం చేసుకోవాలని యూఎస్ అనుకుంటోందేమో. మేం మాత్రం ఆ దీవిని ఎట్టి పరిస్థితుల్లోనూ అమ్మకానికి పెట్టబోం’ అని అప్పుడు తేల్చిచెప్పింది. ఆ తర్వాత తాజాగా శుక్రవారం అగ్రరాజ్యానికి దిమ్మతిరిగే కౌంటర్ ఒకటి ఓ డెన్మార్క్ పత్రికలో వచ్చింది.
‘గ్రీన్లాండ్ను అమెరికా కొనటం కాదు. మేమే అమెరికాను హోల్సేల్గా కొనేద్దామనుకుంటున్నాం. ఇప్పటి వరకు మాకు అసలు ఆ ఉద్దేశం లేదు. కానీ ఇప్పుడిప్పుడే ఆసక్తి కలుగుతోంది’ అని డెన్మార్క్ సర్కార్ పేరుతో వచ్చిన ఒక వార్త సంచలనం సృష్టించింది. అందులో డ్యానిష్ గవర్నమెంట్ స్పోక్స్పర్సన్ ఒకరు డొనాల్డ్ ట్రంప్కి భారీ ఆఫర్ ఇచ్చారు. ‘ట్రంప్ హయాంలో యూఎస్లో అన్నీ (ప్రభుత్వం సహా) అమ్మకానికి ఉన్నట్లే కనిపిస్తోంది. ప్రతిదానికీ ఎంతో కొంత రేటు కట్టి ఓన్ చేసుకోవాలని కోరికగా ఉంది’ అని అనేశారు.
ట్రంప్ అడ్మినిస్ట్రేషన్ మినహా యావత్ అమెరికాను డెన్మార్క్ తన పరం చేసుకోవాలని ఆశపడుతున్నట్లు ఆ స్పోక్స్ పర్సన్ అన్నారు సరదాగా. కాకపోతే అమెరికా తమ సొంతం అయ్యాక ట్రంప్ను, ఆయన అధికార యంత్రాంగాన్ని వేరే ఏదైనా దేశానికి తరలించాలనేదే ఈ సేల్కు సంబంధించిన ముఖ్యమైన కండిషన్ అని ఆయన స్పష్టం చేశారు. ట్రంప్ను ఎక్కడికి పంపాలో వెతకాల్సి ఉందని, అది రష్యా కావొచ్చని, నార్త్ కొరియా కూడా కావొచ్చని, ఆ రెండే ఆయనకు సరైన దేశాలని చమత్కరించారు.
‘అమెరికాను సొంతం చేసుకోవటానికి డెన్మార్క్ వేసే బిడ్కు అప్రూవల్ వస్తే ఇక అమెరికాను కొత్తగా ఎలా డెవలప్ చేయాలనే విషయంలో తమకు చాలా ప్లాన్లు ఉన్నాయని చెప్పారు. సరికొత్త ఎడ్యుకేషనల్ సిస్టమ్ను, నేషనల్ హెల్త్ కేర్ను యూఎస్కు అందించి ఆ అతి పెద్ద భూభాగాన్ని అత్యంత గొప్ప దేశంగా మలచగలం’ అని డెన్మార్క్ అధికార ప్రతినిధి వివరిస్తున్నట్లు ‘ది న్యూ యార్కర్’ పేపర్లో ప్రింట్ అయిన న్యూస్ శుక్రవారం హల్చల్ చేసింది.
జోక్ న్యూస్
అయితే ఇదంతా నిజమైన వార్త కాదని, జోక్ న్యూస్ అని తెలిసి అంతా నవ్వుకున్నారు. ఈ సెటైరికల్ న్యూస్ కాలమ్ను ఆండీ బోరోవిట్జ్ అనే కమెడియన్ 21 ఏళ్లుగా రెగ్యులర్గా రాస్తున్నారు. అది ‘ది బోరోవిట్జ్ రిపోర్ట్’గా పాపులరైంది. దానికి ప్రపంచవ్యాప్తంగా లక్షల సంఖ్యలో రీడర్లు ఉన్నారు.
