ఎయిర్ లైన్స్ పెద్ద మనసు..అమ్మకోసం..అద్దగంట ఆగిన విమానం..

• చావుబతుకుల్లో ఉన్న తల్లిని చూడగలిగిన కూతురు
• అమెరికాలోని డెల్టా ఎయిర్ లైన్స్ సిబ్బంది పెద్ద మనసు 

.వాషింగ్టన్: అమెరికాకు చెందిన డెల్టా ఎయిర్ లైన్స్ పెద్ద మనసు చాటుకుంది. చావుబతుకుల్లో ఉన్న అమ్మను చూడాలన్న కూతురి కోరికను నెరవేర్చింది. అరగంట పాటు విమానాన్ని ఆపి, ఆమెను అమ్మ దగ్గరికి చేర్చింది. 

చివరి క్షణాల్లో కూతురును చూసిన అమ్మ.. ఆ మరుసటి రోజు కన్నుమూసింది. హన్నా వైట్ అనే మహిళ అమెరికాలోని డాలస్​లో ఉంటున్నది. ఆమె తల్లి కాథ్లిన్ నెల్సన్ నార్త్  డకోటాలో ఉంటున్నది. అయితే న్యూమోనియాతో బాధపడుతున్న నెల్సన్ ఆరోగ్యం పూర్తిగా క్షీణించింది. 

ఇంకా కొన్ని గంటలే బతుకుతుందని హన్నా వైట్​కు డాక్టర్ల నుంచి ఫోన్ వచ్చింది. దీంతో చివరి క్షణాల్లో తల్లిని చూడాలని హన్నా వైట్ నిర్ణయించుకుంది. డాలస్ నుంచి నార్త్ డకోటాకు డెల్టా ఎయిర్ లైన్స్​కు చెందిన కనెక్టింగ్ ఫ్లైట్ బుక్ చేసుకుంది. ఆమె డాలస్ నుంచి మినియాపొలిస్ వెళ్లి, అక్కడ నార్త్ డకోటా ఫ్లైట్ ఎక్కాల్సి ఉంది. 

ఫ్లైట్ ఆలస్యమవడంతో.. 

హన్నా వైట్ డాలస్ నుంచి వెళ్లాల్సిన ఫ్లైట్ గంట ఆలస్యమైంది. దీంతో మినియాపొలిస్​లో కనెక్టింగ్ ఫ్లైట్ అందకపోవచ్చునని, నార్త్ డకోటా వెళ్లాల్సిన ప్యాసింజర్లు మరుసటి రోజుకు రీబుకింగ్ చేసుకోవాలని ఫ్లైట్​లోకి ఎక్కిన తర్వాత సిబ్బంది సూచించారు. 

ఆ మాట విని హన్నా వైట్ కన్నీటి పర్యంతమైంది. తన తల్లిని బతికి ఉండగా చూడలేనని తల్లడిల్లిపోయింది. తన పరిస్థితిని ఫ్లైట్ సిబ్బందికి వివరించింది. అది విని పైలెట్ చలించిపోయారు. వెంటనే మినియాపొలిస్​లోని కనెక్టింగ్ ఫ్లైట్ పైలట్​కు ఫోన్ చేశారు. 

హన్నా వైట్ పరిస్థితిని వివరించి, ఆమె వచ్చే వరకు ఫ్లైట్​ను ఆపాలని కోరారు. దీంతో 30 నిమిషాల పాటు ఆ ఫ్లైట్ ను ఆపడంతో హన్నా వైట్ దాన్ని అందుకోగలిగింది. ‘‘డెల్టా ఎయిర్ లైన్స్ సిబ్బంది సహకారంతో నేను నా తల్లిని చివరి క్షణాల్లో చూడగలిగాను. 

ఆమెతో 24 గంటలు గడపగలిగాను. ఆ మరుసటి రోజు అమ్మ ఆనందంగా కన్నుమూసింది. ఇది నా జీవితంలో మరిచిపోలేని రోజు” అని హన్నా వైట్ పేర్కొంది.