- సర్వే నంబర్ 462లో భారీ షెడ్ల తొలగింపు
- స్పోర్ట్స్ఆడిటోరియం, ఇతర నిర్మాణాలు నేలమట్టం
రామచంద్రాపురం (అమీన్పూర్), వెలుగు: సంగారెడ్డి జిల్లా అమీన్పూర్ మున్సిపల్ చైర్మన్ పాండురంగా రెడ్డికి సంబంధించిన అక్రమ కట్టడాలను అధికారు లు కూల్చివేశారు. అమీన్పూర్ మున్సిపాలిటీ పరిధిలోని సర్వే నంబర్ 462లో ఉన్న ప్రభుత్వ భూములను పాండురంగా రెడ్డి ఆక్రమించి నిర్మాణాలు చేపట్టారని ఆ నిర్మాణాలను అధికారులు మంగళవారం కూల్చివేశారు. ఉదయం 11 గంటల ప్రాంతంలో బంధంకొమ్ము ఏరియాలోని ప్రభుత్వ భూమిలో భారీ షెడ్లు, స్పోర్ట్స్ ఆడిటోరియం, ఇతర నిర్మాణాలను నేలమట్టం చేశారు. రెవెన్యూ, మున్సిపల్ ఆధ్వర్యంలో రెండు బృందాలు అక్కడికి చేరుకున్నాయి.
విషయం తెలుసుకున్న చైర్మన్ పాండురంగారెడ్డి తన కొడుకు, అనుచరులతో కలిసి అక్కడికి చేరుకుని అధికారులతో వాగ్వాదానికి దిగారు. కూల్చివేతలను అడ్డుకునేందుకు యత్నించారు. పట్టా భూమిలోనే నిర్మాణాలు చేశామని తహసీల్దార్ రాధతో చైర్మన్ గొడవకు దిగారు. దీంతో పోలీసులు రంగప్రవేశం చేసి చైర్మన్ను, అతని అనుచరులను అక్కడి నుంచి పంపించారు. దీంతో అధికారులు ఆ కట్టడాలను నేలమట్టం చేశారు.
అన్ని రికార్డులు నిర్ధారించాకే కూల్చివేతలు చేపట్టామని తహసీల్దార్ రాధ స్పష్టం చేశారు. అలాగే, అమీన్పూర్ మండల పరిధిలోని ఐలాపూర్ తండాలో కూడా అక్రమ నిర్మాణాలను కూల్చివేశారు. సర్వే నంబర్ 119, 221లోని దాదాపు 20 ఎకరాల ప్రభుత్వ స్థలంలో పలు నిర్మాణాలు, హద్దు రాళ్లను జేసీబీల సాయంతో తొలగించారు.
