- హిమాచల్, కర్నాటక, తెలంగాణ లో అమలుకాలే
- కాంగ్రెస్ ర్యాలీల్లో పాకిస్తాన్అనుకూల నినాదాలు
- హర్యానాలోని బాద్షాపూర్లో ఎన్నికల ప్రచారం
చండీగఢ్: రాహుల్ఎన్నికల గ్యారంటీలన్నీ కోతలేనని కాంగ్రెస్అధికారంలో ఉన్న హిమాచల్ప్రదేశ్, కర్నాటక, తెలంగాణలో నిరూపితమైందని కేంద్ర హోంమంత్రి అమిత్షా విమర్శించారు. ఆ రాష్ట్రాల్లో ఇచ్చిన హామీలను నెరవేర్చలేక పోయారని తెలిపారు. అదే సమయంలో బీజేపీ నెరవేర్చగలిగే హామీలను మాత్రమే ఇస్తుందని స్పష్టం చేశారు. హర్యానాలోని బాద్షాపూర్లో ఆదివారం నిర్వహించిన అసెంబ్లీ ఎన్నికల ర్యాలీలో అమిత్ షా పాల్గొని, మాట్లాడారు. రాహుల్బాబా అండ్ కంపెనీ ఎలాంటి అభివృద్ధిని చేపట్టదని, హర్యానాలో డెవలప్మెంట్ కేవలం బీజేపీ డబుల్ఇంజిన్ సర్కారుతోనే సాధ్యమని చెప్పారు. ‘‘మేం సరిహద్దును పరిరక్షిస్తాం. రిజర్వేషన్లను కాపాడుతాం.
ఆర్టికల్370ని మళ్లీ తేకుండా చూస్తాం” అని పేర్కొన్నారు. ప్రస్తుతం ఉన్న వక్ఫ్బోర్డు చట్టంతో సమస్య ఉన్నదని, దాన్ని రాబోయే శీతాకాల పార్లమెంట్సమావేశాల్లో సవరిస్తామని తెలిపారు. ఇందిరా గాంధీ నుంచి మన్మోహన్ సింగ్ వరకూ ఏ కాంగ్రెస్ ప్రధాని కూడా సైనికులకు వన్ ర్యాంక్ వన్ పెన్షన్ కల్పించలేకపోయారని, 2015లో నరేంద్ర మోదీ సర్కారు వన్ ర్యాంక్ వన్ పెన్షన్ను తీసుకొచ్చిందని చెప్పారు. అగ్నిపథ్ స్కీంపై రాహుల్ గాంధీ అబద్ధాలు ఆడుతున్నారని మండిపడ్డారు. సాయుధ దళాల్లో యువత ప్రొఫైల్ను నిర్ధారించేందుకు ఈ స్కీమ్ తెచ్చినట్టు చెప్పారు. పిల్లలను ఆర్మీలోకి పంపేందుకు వెనుకాడొద్దని, ప్రతి అగ్నివీర్కు పెన్షన్ సౌకర్యమున్న ఉద్యోగాలిస్తామని తెలిపారు.
యువత త్యాగాలు వృథా కానివ్వం
కాంగ్రెస్ పార్టీ ఆర్టికల్ 370ని తిరిగి తెస్తామని అంటున్నదని అమిత్షా మండిపడ్డారు. ‘‘జమ్మూ కాశ్మీర్మనదా? కాదా? రాహుల్ గాంధీ, ఆయన పార్టీ ఈ ఆర్టికల్ను పునరుద్ధరిస్తామంటున్నారు. రాహుల్గాంధీ, ఆయన తర్వాత మరో మూడు తరాలు వచ్చినా ఆ ఆర్టికల్ను వెనక్కి తీసుకురాలేరు” అని అన్నారు. హర్యానా కోసం యువత ఎన్నో త్యాగాలు చేశారని చెప్పారు. వారి త్యాగాలను వృథా కానివ్వబోమని అన్నారు.
రాష్ట్రంలో బీజేపీ అధికారంలోకి వస్తే రాబోయే ఐదేండ్లలో 5 లక్షల మందికి ప్రతిభ ఆధారంగా ఉద్యోగాలిస్తామని చెప్పారు. కాంగ్రెస్సభల్లో పాకిస్తాన్అనుకూల నినాదాలు పెరుగుతున్నాయని ఆందోళన వ్యక్తంచేశారు. పార్టీ నాయకులు, కార్యకర్తలు ఇలాంటి నినాదాలు చేస్తుంటే ఎందుకు మాట్లాడడం లేదని రాహుల్గాంధీని అమిత్ షా ప్రశ్నించారు.
