అమెరికా ఫ్లైట్​కు బాంబు బెదిరింపు

• ఫైటర్ జెట్ల ఎస్కార్ట్​తో రోమ్​లో దించిన అధికారులు

వాషింగ్టన్: న్యూయార్క్ నుంచి ఢిల్లీకి బయలుదేరిన అమెరికన్ ఎయిర్ లైన్స్  విమానానికి బాంబు బెదిరింపు రావడంతో రోమ్​కు మళ్లించారు. ఫైటర్ జెట్ల ఎస్కార్ట్ తో రోమ్​లో సేఫ్​గా ల్యాండ్ చేయించారు. అమెరికా టైం ప్రకారం ఆదివారం మధ్యాహ్నం ఈ ఘటన జరిగింది. అమెరికన్ ఎయిర్ లైన్స్​కు చెందిన ఫ్లైట్ ఏఏ292 శనివారం (ఈనెల 22) రాత్రి 8.11 గంటలకు న్యూయార్క్​లోని జాన్ ఎఫ్  కెనడీ అంతర్జాతీయ విమానం నుంచి టేకాఫ్​  అయింది. 

ఆదివారం మధ్యాహ్నం ఫ్లైట్ ఢిల్లీకి మూడు గంటల దూరంలో ఉండగా.. విమానానికి బాంబు బెదిరింపు వచ్చింది. దీంతో విమాన సిబ్బంది ఈ విషయాన్ని అధికారులకు తెలిపారు. వారి సూచనలతో విమానాన్ని రోమ్​కు మళ్లించారు.  ‘‘భద్రతా కారణాల వల్ల విమానాన్ని రోమ్​కు మళ్లిస్తున్నాం. ప్రయాణికులు ఆందోళన చెందవద్దు” అని విమాన సిబ్బంది సూచించారు. 

కాసేపటి తర్వాత యూరప్ కు చెందిన రెండు ఫైటర్ జెట్లు ఆ విమానానికి ఎస్కార్టుగా వెళ్లాయి. రోమ్ లోని ఫియుమిసినో ఎయిర్ పోర్టులో ల్యాండయింది. విమానాన్ని ఫైటర్  జెట్లు ఎస్కార్ట్  చేస్తున్న విజువల్స్​ను ఇటాలియన్ ఎయిర్ ఫోర్స్  విడుదల చేసింది. కాగా.. ఫ్లైట్​ను మధ్యలోనే దారిమళ్లిస్తున్నట్లు విమాన సిబ్బంది చెప్పడంతో ఆందోళనకు గురయ్యామని ఫ్లైట్​లోని ఇండియన్ ప్రయాణికులు తెలిపారు. 

రోమ్​లో దిగిన తర్వాత వారు మీడియాతో మాట్లాడారు. ‘‘విమానాన్ని దారి మళ్లిస్తున్నట్లు సడన్​గా చెప్పడంతో అందరం భయపడ్డాం. పరిస్థితిని క్యాబిన్ సిబ్బంది తెలివిగా హ్యాండిల్ చేశారు. ఇందుకు వారికి కృతజ్ఞతలు” అని ఇండియన్ ప్రయాణికులు పేర్కొన్నారు. అయితే.. రోమ్​లో తాను చిక్కుకుపోయాయని లక్కీ చావ్లా అనే భారతీయ ప్రయాణికుడు ‘ఎక్స్’ లో తెలిపాడు. తన లగేజీ మిస్ అయిందని వాపోయాడు.