- భాగ్యనగర్ తండాలో విషాదం
కారేపల్లి, వెలుగు : ఖమ్మం జిల్లా కారేపల్లి మండలంలోని భాగ్యనగర్ తండాలో సెలవుపై ఇంటికి వచ్చిన ఓ ఆర్మీ జవాన్ జ్వరంతో కన్నుమూశాడు. మృతుడి కుటుంబీకుల కథనం ప్రకారం.. మండలంలోని భాగ్యనగర్ తండాకు చెందిన తేజావత్ బాలాజీ (40) 2007లో ఆర్మీలో చేరాడు. ప్రస్తుతం పంజాబ్ బీఎస్ఎఫ్లో పనిచేస్తున్నాడు. లూథియానా 9వ బెటాలియన్కు బదిలీ చేయడంతో సెలవులు ఇవ్వగా ఈ మధ్యే ఇంటికి వచ్చాడు. వారం క్రితం తీవ్ర జ్వరం రాగా కుటుంబసభ్యులు ఖమ్మం దవాఖానకు తరలించారు.
ఫిట్స్ రావడంతో హైదరాబాద్ తరలించగా చికిత్స పొందుతూ గుండెపోటుతో శుక్రవారం చనిపోయాడు. బాలాజీకి భార్య రాజేశ్వరి, కొడుకు రోహిత్ సింగ్, బిడ్డ చాందిని ఉన్నారు. భౌతికకాయాన్ని స్వగ్రామమైన భాగ్యనగర్ తండాకు తరలించారు. సైనిక లాంఛనాలతో శనివారం అంత్యక్రియలు నిర్వహిస్తారని కుటుంబసభ్యులు తెలిపారు.
