- ‘అమ్మ.. నేను సక్సెస్ కాలేను’
- బాచుపల్లిలో ఇంటర్ స్టూడెంట్ ఆత్మహత్య
- ఘటనపై విచారణ జరిపించాలని విద్యార్థి సంఘాల డిమాండ్
జీడిమెట్ల, వెలుగు : తన మృతికి బంధువులే కారణమంటూ బాచుపల్లిలోని ఓ ఇంటర్ స్టూడెంట్ ఆత్మహత్య చేసుకున్నాడు. కామారెడ్డికి చెందిన రాజు, రాధిక దంపతుల కొడుకు జస్వంత్గౌడ్ (17) బాచుపల్లిలోని ఓ కార్పొరేట్ కాలేజీలో బైపీసీ ఫస్టియర్ చదువుతున్నాడు. బుధవారం అర్ధరాత్రి తన హాస్టల్ గదిలో సీలింగ్ ఫ్యాన్కు ఉరేసుకుని మృతి చెందాడు. ఘటనా స్థలంలో రెండు పేజీల సూసైడ్ నోట్ను పోలీసులు గుర్తించారు. అందులో ‘‘ అమ్మానాన్న నేను చేసింది తప్పే. నాకు లైఫ్పై హోప్స్ లేవు. అమ్మ నేను ఎందులో కూడా సక్సెస్ కాలేను. చెల్లిని అమ్మను బాగా చూసుకో నాన్న.
నా చావుకు ప్రధాన కారణం బంధువులు పెంటవ్వ, భారతి, వెంకట్గౌడ్, భాగ్య, ఎల్లాగౌడ్, రేణుకలే” అని పేర్కొన్నారు. ఈ ఘటనపై కేసు నమోదు చేసి పోలీసులు దర్యాప్తు చేపట్టారు. డెడ్బాడీని పోస్టుమార్టం నిమిత్తం గాంధీ ఆసుపత్రికి తరలించారు. మరోవైపు, కాలేజీలో విద్యార్థి ఆత్మహత్య చేసుకోవడంపై పలు విద్యార్థి సంఘాల నాయకులు ఆగ్రహం వ్యక్తం చేశారు. యాజమాన్యం ఒత్తిడితో పిల్లలు మానసికంగా కుంగిపోతున్నారన్నారు. విద్యార్థి సూసైడ్చేసుకుంటుంటే గుర్తించలేని స్థితిలో సిబ్బంది ఉన్నారని కాలేజీ ఎదుట గురువారం ఆందోళన చేపట్టారు. కాలేజీపై కఠిన చర్యలు తీసుకోవాలని డిమాండ్ చేశారు.
