ముషీరాబాద్, వెలుగు: అంగన్వాడీ టీచర్స్, హెల్పర్లకు కాంగ్రెస్ ప్రభుత్వం ఇచ్చిన హామీ ప్రకారం వేతనాలను రూ.18 వేలకు పెంచాలని తెలంగాణ అంగన్వాడీ టీచర్స్ అండ్ హెల్పర్స్ యూనియన్ (సీఐటీయూ) డిమాండ్ చేసింది. గురువారం ఇందిరా పార్క్ ధర్నా చౌక్ వద్ద దాదాపు 2 వేల మంది అంగన్వాడీలతో ధర్నా నిర్వహించింది. ధర్నాలో సీఐటీయూ రాష్ట్ర ఉపాధ్యక్షుడు కె.ఈశ్వర్ రావు, అధ్యక్షురాలు కె సునీత, ప్రధాన కార్యదర్శి జయలక్ష్మి పాల్గొని మాట్లాడారు.
అంగన్వాడీ టీచర్లు, హెల్పర్ల సమస్యల పరిష్కరించాలంటూ 2023 సెప్టెంబర్ 11 నుంచి అక్టోబర్ 4 వరకు 24 రోజులు రాష్ట్రవ్యాప్తంగా సమ్మె నిర్వహించామని గుర్తుచేశారు. సమ్మె కాలానికి వేతనాలు చెల్లించాలని డిమాండ్ చేశారు. కాంగ్రెస్ ప్రభుత్వం ఎన్నికల మేనిఫెస్టోలో ఇచ్చిన హామీ ప్రకారం వేతనం రూ.18 వేలకు పెంచాలని, పీఎఫ్ సౌకర్యం కల్పించాలని, 7 నెలల బకాయిలు చెల్లించాలని కోరారు. సంక్షేమ పథకాలనూ అమలు చేయాలన్నారు. ఆరోగ్యలక్ష్మి మెనూ చార్జ్ పిల్లలకు రూ.1.15 నుంచి రూ.5కు, బాలింతలకు రూ.2.40 నుంచి రూ.10కి పెంచాలని, అన్ని కేంద్రాలకు డబుల్ సిలిండర్ మంజూరు చేయాలని విజ్ఞప్తి చేశారు.
సమస్యలు పరిష్కరిస్తం: మంత్రి సీతక్క హామీ
అంగన్వాడీల సమస్యలు పరిష్కరిస్తామని మంత్రి సీతక్క హామీ ఇచ్చారు. కనీస వేతనం రూ.18వేలకు పెంచాలని, పీఎఫ్, ఈఎస్ఐ, రిటైర్ మెంట్ బెనిఫిట్స్ ఇవ్వాలని కోరుతూ ఇందిరాపార్కు దగ్గర ఆందోళన చేపట్టిన అంగన్వాడీ టీచర్లు, హెల్పర్లను పోలీసులు సెక్రటేరియెట్లో మంత్రి సీతక్క దగ్గరకు తీసుకొచ్చారు. పీఎఫ్, ఈఎస్ఐ రిటైర్మెంట్ బెనిఫిట్స్ పెంచుతూ కొత్త జీవో త్వరలో ఇస్తామని మంత్రి వారితో చెప్పారు. మినీ అంగన్వాడీల నుంచి మెయిన్ అంగన్వాడీల టీచర్లు అయినవారికి 7 నెలల బకాయిలు వేతనాలు చెల్లించాలని ప్రతినిధులు మంత్రిని కోరారు.
