ప్రీ ప్రైమరీ స్కూళ్లుగా అంగన్వాడీలు.. సౌలత్​లకు ఫండ్స్​ రిలీజ్

• సొంత బిల్డింగ్​లకు రిపేర్లు
• డ్రింకింగ్​ వాటర్​ కనెక్షన్లతోపాటు టాయిలెట్స్​ ఏర్పాటు
• యాదాద్రికి రూ. 98.13 లక్షలు
• సూర్యాపేటకు రూ. 58.82 లక్షలు

అంగన్వాడీలను ఫ్రీ ఫ్రైమరీ స్కూల్స్​గా మార్చేందుకు ప్రభుత్వం వేగంగా అడుగులు వేస్తోంది. నేషనల్ ఎడ్యుకేషన్ పాలసీలో భాగంగా వీటిని మరింత బలోపేతం చేయనుంది. ఇప్పటికే అంగన్వాడీ టీచర్లకు ట్రైనింగ్ ఇవ్వడమే కాకుండా పిల్లలకు ఏ నెలలో ఏం బోధించాలో సూచిస్తూ రెండు రకాల బుక్స్​తోపాటు యూనిఫామ్స్​అందజేస్తోంది. తాజాగా పలు సెంటర్లను గుర్తించి వాటిలో సౌలత్​ల ఏర్పాటుకు ఫండ్స్ ​రిలీజ్ చేసింది. 

యాదాద్రి, సూర్యాపేట, వెలుగు  ; అంగన్వాడీ కేంద్రాల్లో టీచర్లను నియమించి పిల్లలు మూడో తరగతి వరకూ అక్కడే చదివే విధంగా చర్యలు తీసుకోవాలని రాష్ట్ర  ప్రభుత్వం నిర్ణయించింది.  అయితే, ఫ్రీ ప్రైమరీ స్కూల్స్​గా రూపుదిద్దుకోనున్న చాలా అంగన్వాడీలకు సొంత బిల్డింగ్​లు లేవు. ఉన్న వాటిల్లోనూ సరైన సౌలత్​లు లేవు. దీంతో ముందుగా సొంత బిల్డింగ్​ల్లో సౌలత్​లు కల్పించాలని ప్రభుత్వం నిర్ణయం తీసుకుంది.

ఇందులో భాగంగా ఆయా బిల్డింగ్​లకు మరమ్మత్తులు చేయించి వాటికి కలర్స్​ వేయించనుంది. కిచెన్ రూమ్స్​కు గాలి, వెలుతురు బాగా వచ్చే విధంగా కిటికీలు, ఇనుప జాలీలు ఏర్పాటు చేయనుంది. అలాగే మిషన్​ భగీరథ నుంచి డ్రింకింగ్​ వాటర్​ కనెక్షన్లు, టాయిలెట్లు నిర్మించనుంది. మరోవైపు గవర్నమెంట్ ​స్కూల్స్​ఆవరణలో ఉన్న వాటిని మోడల్ ​అంగన్వాడీలుగా గుర్తించి  ఫర్నీచర్ అందజేస్తోంది.

యాదాద్రికి రూ. 98.13 లక్షలు

యాదాద్రి జిల్లాలోని భువనగిరి, ఆలేరు, రామన్నపేట, మోత్కూరు ఐసీడీఎస్​ ప్రాజెక్టుల పరిధిలో 901 అంగన్వాడీ సెంటర్లు ఉన్నాయి. వీటిలో 234 సొంత బిల్డింగ్​ల్లో నిర్వహిస్తుండగా, 423 సెంటర్లు అద్దె లేకుండా సమకూర్చిన బిల్డింగ్​లో నిర్వహిస్తున్నారు. వీటిలో 114 సెంటర్లు ప్రభుత్వ పాఠశాలల పరిధిలో నడుస్తున్నాయి. మరో 244 సెంటర్లు అద్దె బిల్డింగ్​లో నిర్వహణ సాగుతోంది. వీటి ద్వారా 5,024 మంది గర్భిణీలు, 4,392 మంది బాలింతలతో పాటు 36,084 మంది చిన్నారులు ప్రయోజనం పొందుతున్నారు. కాగా, సొంత బిల్డింగ్​ల్లో కొనసాగుతున్న జిల్లాలోని సెంటర్లలో సౌలత్​లు కల్పించేందుకు ప్రభుత్వం రూ. 98.13 లక్షలను విడుదల చేసింది. ఈ నిధులతో 200 సెంటర్లలో టాయిలెట్స్​ నిర్మాణం, 50 సెంటర్లలో తాగునీరు సౌలత్​ కోసం మిషన్​ భగీరథ ట్యాప్​ కనెక్షన్లు, 7 సెంటర్లలో బిల్డింగ్​లకు మరమ్మత్తులు చేయించాలని ప్రభుత్వం యంత్రాంగం నిర్ణయించింది.

సూర్యాపేటకు రూ. 58.84 లక్షలు

సూర్యాపేట జిల్లాలోని చివ్వెంల, తుంగతుర్తి, హుజూర్‌‌‌‌‌‌‌‌నగర్, కోదాడ, సూర్యాపేట అర్బన్‌‌‌‌‌‌‌‌ ఐసీడీఎస్​ ప్రాజెక్టుల పరిధిలో 1,209 అంగన్వాడీ సెంటర్లు ఉన్నాయి. వీటిలో 311 సొంత బిల్డింగ్​లు ఉన్నాయి. 435 సెంటర్లు ఇతర ప్రభుత్వ బిల్డింగ్​ల్లో అద్దె లేకుండా, మరో 463 సెంటర్లు అద్దె బిల్డింగ్​లో నిర్వహిస్తున్నారు. వీటి పరిధిలో 28,479  మంది చిన్నారులు,  12, 797 మంది గర్భిణులు, బాలింతలకు పౌష్టికాహారం అందిస్తున్నారు. సొంత బిల్డింగ్​ల్లో కొనసాగుతున్న బిల్డింగ్​లో సౌలత్​లు ఏర్పాటు చేయడానికి ప్రభుత్వం రూ. 58.84 లక్షలు రిలీజ్​ చేసింది. ఈ మొత్తంతో 15 అంగన్వాడీ సెంటర్లను రిపేర్​ చేయడంతో పాటు కలర్స్​ వేయనున్నారు. 207 సెంటర్లలో టాయిలెట్ల నిర్మాణం, 40 సెంటర్లకు డ్రింకింగ్​ వాటర్​ కోసం ట్యాప్​ కనెక్షన్​ ఇవ్వనున్నారు. 

ఖర్చు చేయకుంటే వాపసే 

సౌలత్​ల ఏర్పాటు కోసం ప్రభుత్వం రిలీజ్​ చేసిన ఫండ్స్​ను ఈ ఫైనాన్స్​ఇయర్​లో ఖర్చు చేయాల్సి ఉంటుంది. అంటే వచ్చే ఏడాది మార్చి 31లోగా బిల్డింగ్​లను గుర్తించి పనులు పూర్తి చేయాల్సి ఉంటుంది. లేని పక్షంలో ఫండ్స్​ వాపస్​  వెళ్లిపోతాయి. 

సెంటర్లను గుర్తిస్తున్నాం

అంగన్వాడీ సెంటర్లలో సౌలత్​ల కోసం ఫండ్స్​ రిలీజ్​ అయ్యాయి. వీటితో ఏఏ సెంటర్లలో టాయిలెట్స్, డ్రింకింగ్​ వాటర్​ కనెక్షన్లు, మరమ్మత్తులు చేపట్టాలో గుర్తిస్తున్నాం. ఈ ప్రక్రియ తర్వాత పనులను ప్రారంభిస్తాం.

- కృష్ణవేణి, యాదాద్రి జిల్లా వెల్ఫేర్ ఆఫీసర్