- కర్రలు, క్రికెట్స్టంప్స్తో దాడికి దిగిన బీఆర్ఎస్ లీడర్లు
- ఐదుగురు కాంగ్రెస్ లీడర్లకు గాయాలు
- భయపడేది లేదన్న టీపీసీసీ నేత అనిరుధ్రెడ్డి
జడ్చర్ల/జడ్చర్ల టౌన్, వెలుగు : టీపీసీసీ ప్రధాన కార్యదర్శి జనంపల్లి అనిరుధ్రెడ్డి చేపట్టిన ‘ప్రజాహిత పాదయాత్ర’లో ఉద్రిక్తత చోటు చేసుకుంది. యాత్ర చేస్తున్న కాంగ్రెస్ లీడర్లపై కొందరు బీఆర్ఎస్ లీడర్లు కర్రలు, క్రికెట్స్టంప్స్తో దాడికి చేయడంతో ఆరుగురు గాయపడ్డారు. మహబూబ్నగర్జిల్లా జడ్చర్ల నియోజకవర్గంలో టీపీసీసీ ప్రధాన కార్యదర్శి అనిరుధ్రెడ్డి ప్రజాహిత పాదయాత్ర నిర్వహిస్తున్నారు. ఈ యాత్ర ఆదివారం జడ్చర్ల మండలంలోని నసరుల్లాబాద్ కు చేరుకుంది. అక్కడ జరిగిన కార్నర్ మీటింగ్లో అనిరుధ్రెడ్డి మాట్లాడుతూ 2008లో దళితుల శ్మశానవాటిక కోసం అప్పటి కాంగ్రెస్ ప్రభుత్వం 19 గుంటల భూమిని కేటాయించిందన్నారు. కానీ, ఆ భూమిని బీఆర్ఎస్ పార్టీకి చెందిన ఓ లీడర్ ఆక్రమించుకుని ప్లాట్లు చేసి అమ్మేసింది చాలక..జడ్చర్ల హౌసింగ్బోర్డులో భూ కబ్జాలకు పాల్పడుతున్నారని ఆరోపించారు.
విషయం తెలుసుకున్న రూలింగ్పార్టీకి చెందిన స్థానిక సర్పంచ్ ప్రణీల్చందర్, తన అనుచరులతో కార్నర్మీటింగ్జరిగే చోటికి చేరుకున్నారు. ఈ సందర్భంగా కాంగ్రెస్కార్యకర్తలకు, ప్రణీల్చందర్, ఆయన అనుచరులకు వాగ్వాదం, తోపులాట జరిగింది. కొద్దిసేపటికి కాంగ్రెస్ కార్యకర్తలపై కొంతమంది కర్రలతో దాడికి దిగారు. ఈ ఘటనలో జడ్చర్ల మహిళా కాంగ్రెస్ప్రెసిడెంట్భర్త ఆశన్న, నాయకులు రమేశ్నాయక్, రవి నాయక్, పెంట్యా నాయక్, బాలు ముదిరాజ్గాయపడ్డారు. వీరిని జడ్చర్ల జనరల్హాస్పిటల్కు తరలించారు. అంతకుముందు గ్రామంలో పాదయాత్ర ప్రవేశిస్తోందని డప్పు చాటింపు వేయించగా అడ్డుకున్నట్టు తెలిసింది.
గొడవ తర్వాత అనిరుధ్రెడ్డి మాట్లాడుతూ పాదయాత్రకు ప్రజల్లో వస్తున్న స్పందనను చూసి ఓర్వలేకనే దాడులుకు దిగుతున్నారని విమర్శించారు. ఇలాంటి తాటాకు చప్పుళ్లకు భయపడేది లేదన్నారు. జడ్చర్ల నియోజకవర్గంలో బీఆర్ఎస్ పార్టీ లీడర్ల అక్రమాలు, భూ దందాలు, కబ్జాలను ఒక్కొక్కటిగా బయట పెడతామని హెచ్చరించారు. రూలింగ్పార్టీకి రోజులు దగ్గర పడ్డాయని, త్వరలో జరిగే ఎన్నికల్లో జడ్చర్ల గడ్డపై ప్రజల ఆశీర్వాదంతో కాంగ్రెస్జెండా ఎగుర వేస్తామన్నారు.
