ఫ్యామిలీతో ఓ మూడు రోజులు ట్రిప్ వెళ్తే మొక్కల సంగతి ఎలా? అని ఆలోచిస్తుంటారు చాలామంది. అలాంటివాళ్ల కోసం కొన్ని కేరింగ్ టిప్స్ చెప్తోంది మహారాష్ట్రకు చెందిన అన్నాట్ మాథ్యూస్. ఎనిమిదేళ్లుగా 300 వెరైటీ మొక్కల్ని పెంచుతోంది. గీక్స్ ఆఫ్ గ్రీన్ అనే యూట్యూబ్ ఛానల్ కూడా నడుపుతోంది. ఆ ఛానెల్కు ఎనభైవేల సబ్స్ర్కైబర్స్ ఉన్నారు.
- ఇంటి పక్కన లేదా ఆ కాలనీలో గార్డెనింగ్ ఇష్టపడేవాళ్లతో ఫ్రెండ్షిప్ చేయాలి. మీరు అందుబాటులో లేనప్పుడు వాళ్లను రిక్వెస్ట్ చేస్తే మొక్కల్ని చూసుకుంటారు.
- కొన్ని మొక్కలకు ఎక్కువ నీళ్లు, ఇంకొన్నింటికి వారానికి ఒకసారి నీళ్లు పెడితే సరిపోతుంది. అందుకని ఆ మొక్కల్ని వేటికవి విడివిడిగా పెట్టుకోవాలి. అలా పెట్టుకుంటే నీళ్లు పోసేందుకు వచ్చినవాళ్లకు గైడ్ చేయడం ఈజీగా ఉంటుంది.
- ఎండ నేరుగా పడకుండా కొంచెం నీడ వచ్చే దగ్గర కుండీలను పెట్టాలి. నీడలో ఉంటే మట్టి ఎక్కువ టైం తడిగా ఉంటుంది.
- చిన్న మొక్కల కుండీలన్నీ ఒకే దగ్గర పెట్టాలి.
- వాటరింగ్ పైప్, క్యాన్, స్ప్రేయర్ వంటివి అందుబాటులో ఉంచాలి. టూర్కి వెళ్లే ముందు ఒకసారి సరిపడా నీళ్లు పోయాలి.
- వాటర్ బాటిల్కు రెండు చిన్న రంధ్రాలు పెట్టి, బాటిల్ను నీళ్లతో నింపి కుండీలో పెట్టేయాలి. డ్రిప్లాగా ఒక్కో చుక్కా పడి మొక్క తడి ఆరదు.
- వెడల్పాటి టబ్స్ ఉంటే వాటిలో నీళ్లు నింపాలి. అందులో చిన్న మొక్కల కుండీలు నాలుగైదు కలిపి పెడితే తేమ తగ్గకుండా ఉంటుంది.
- పెద్ద టబ్లో నీళ్లు పోయాలి. అందులో త్రీ పర్సంట్ హైడ్రోజన్ పెరాక్సైడ్, మూడు చుక్కల డిష్ వాష్ లిక్విడ్ పోసి కలపాలి. ఆ నీళ్లు మొక్కలకు స్ప్రే చేస్తే దోమలు రావు.
- ఒక కాటన్ క్లాత్ను తాడులాగ చుట్టాలి. దాని ఒక కొసను మొక్క వేర్ల దగ్గర నాటినట్టు పెట్టాలి. మొక్కల కుండీ పక్కన మరో బకెట్తో నీళ్లు పెట్టి, క్లాత్ రెండో కొసను అందులో ఉంచాలి. ఇలా చేస్తే నెమ్మదిగా మొక్కకు నీళ్లు అందుతుంటాయి.
- మట్టిలో కోకోపిట్ మిక్స్ చేస్తే.. వాటర్ ఎక్కువ పీల్చుకుంటుంది. కాబట్టి ఒకరోజు నీళ్లు పోయకపోయినా పర్వాలేదు.
- ఎండిన ఆకుల వంటివి కుండీలో వేస్తే.. మట్టిలోని తడి త్వరగా ఆరిపోదు. దీన్నే మల్చింగ్ అంటారు.
- మొక్క చుట్టూ తడిపిన బట్టలాంటివి కట్టినా ఉపయోగమే.
