అలంపూర్, వెలుగు: జోగులాంబ అమ్మవారి వార్షిక బ్రహ్మోత్సవాలు ఘనంగా జరుగుతున్నాయి. మంగళవారం విశేష అర్చనలు, చండీహోమం, పవమాన సూక్త పారాయణం, ఆవాహిత దేవతాహోమం, మండపారాధన, బలిహరణ, నీరాజన మంత్రపుష్పం నిర్వహించారు. బుధవారం వసంత పంచమి సందర్భంగా మహా పూర్ణాహుతి, అమ్మవారి ఆలయ యాగశాలలో నిత్యహోమం, కలశ ఉద్వాసన, అమ్మవారి మూలమూర్తికి అవబృదస్నపనం, పంచామృతాభిషేకం నిర్వహిస్తారు.
భక్తులకు అమ్మవారి నిజరూప దర్శనం, సహస్ర ఘటాభిషేకం, సాయత్రం జోగులాంబ, బాలబ్రహ్మేశ్వర స్వామి ఉత్సవ విగ్రహలకు శాంతి కల్యాణోత్సవం నిర్వహించనున్నారు. ధ్వజారోహణ కార్యక్రమంతో ఉత్సవాలు ముగియనున్నాయి. వసంత పంచమి సందర్భంగా ఈ ఒక్కరోజు మాత్రమే అమ్మవారికి ఎలాంటి అలంకరణ లేకుండా నిజరూపంలో దర్శనం ఇవ్వనున్నారు. భక్తులు అధిక సంఖ్యలో వచ్చే అవకాశం ఉండడంతో, వారికి ఇబ్బంది కలగకుండా ఏర్పాట్లు చేసినట్లు ఈవో పురేందర్ కుమార్ తెలిపారు.
