హైదరాబద్ సిటీలో మరికొన్ని బస్తీ దవాఖానలు కావాలి:హెల్త్ డిపార్టుమెంట్

• పట్నంలో మరో 297 బస్తీ దవాఖానలు కావాలి
• ప్రతిపాదనలు పంపిన హైదరాబాద్ జిల్లా వైద్య శాఖ
• ఇప్పటికే 163 ఏర్పాటు 
• ప్రతి 10 వేల మందికి ఒక దవాఖాన ఉండాలనేది కేంద్రం రూల్​
• వేధిస్తున్న సొంత బిల్డింగుల కొరత 

హైదరాబాద్ సిటీ, వెలుగు: హైదరాబాద్ జిల్లాలో త్వరలో మరో 297 బస్తీ దవాఖానలు ఏర్పాటు చేయనున్నారు. దీనికోసం జిల్లా వైద్య శాఖ ఫైనాన్స్​కమిషన్​కు ప్రతిపాదనలు పంపించింది. 2018లో పేదలుండే ప్రాంతాల్లో చిన్న చిన్న అనారోగ్య సమస్యలకు వైద్యం అందించేందుకు బస్తీ దవాఖానలను ఏర్పాటు చేశారు. 

ప్రస్తుతం ఒక్కో చోట రోజూ యావరేజ్​గా 100 వరకు ఓపీ నమోదవుతోంది. ఈ సెంటర్లలో ఓపీ సేవలతో పాటు గర్భిణులు, బాలింతలకు పరీక్షలు, టీకాలు వేయడం, షుగర్, బీపీ, ప్రైమరీ హెల్త్​ టెస్టులతో పాటు 57 రకాల పరీక్షలు చేస్తున్నారు. ఇక్కడ ట్రీట్మెంట్ అందించలేని వ్యాధులకు పీహెచ్​సీలు, ఇతర సర్కారు దవాఖానలకు రెఫర్​చేస్తారు.  

వార్డుకు రెండు చొప్పున ఉండాలని..

హైదరాబాద్​జిల్లాలో 84 వార్డులుండగా, ఒక్కో వార్డుకు రెండు చొప్పున 168 బస్తీ దవాఖానలు ఏర్పాటు చేయాలని గతంలో నిర్ణయించారు. ఇందులో భాగంగా 81 వార్డుల్లో 163 బస్తీ దవాఖానలు తెరిచారు. బేగంబజార్, అడ్డగుట్ట, విజయ నగర్​కాలనీల్లో కమ్యూనిటీ హాళ్లు ఖాళీగా లేకపోవడం, మరికొన్ని చోట్ల కమ్యూనిటీ హాల్స్​లో ఏర్పాటుకు స్థానికులు ఒప్పుకోకపోవడం, సెట్విన్​, ఇతర ట్రైనింగ్​సెంటర్లు నడుస్తుండడంతో దవాఖానాలను ఇతర ప్రాంతాల్లో ఏర్పాటు చేశారు. 

ఇలా గన్​ఫౌండ్రీలో ఐదు, మరికొన్ని చోట్ల రెండు కంటే ఎక్కువ దవాఖానలు ఏర్పాటు చేశారు. 18 వార్డుల్లో కమ్యూనిటీ హాళ్లు లేక ఒక్కొక్క దవాఖానతోనే సరిపెట్టారు. ప్రస్తుతం కంటోన్మెంట్​ఏరియాలో పది బస్తీ దవాఖానలు ఏర్పాటు చేయాల్సి ఉండగా, ఆరు సెంటర్లు రన్​అవుతున్నాయి. మరొకటి ఓపెనింగ్​కు సిద్ధంగా ఉంది. మరో మూడు సెంటర్లకు కమ్యూనిటీ హాళ్లు దొరక్క పెండింగ్​ఉన్నాయని వైద్యాధికారులు తెలిపారు. 

ప్రతి 10 వేల మందికి ఒక దవాఖాన 

కేంద్ర ప్రభుత్వ గైడ్​లైన్స్ ప్రకారం ప్రతి పదివేల మందికి ఒక దవాఖాన ఏర్పాటు చేయాల్సి ఉంటుంది. ఈ లెక్కల ప్రకారం హైదరాబాద్​జిల్లా జనాభా 46 లక్షలు ఉండడంతో 460 బస్తీ దవాఖానాలు ఏర్పాటు చేయాల్సిన అవసరం ఉంది. అయితే నగరంలో ఇప్పటికే 163 సెంటర్లు ఉండగా, మరో 297 సెంటర్లు ఏర్పాటు చేయాలి. దీంతో 297 బస్తీ దవాఖానల కోసం జిల్లా వైద్యాధికారులు ప్రతిపాదనలు పంపారు. ఇప్పటివరకు కమ్యూనిటీ హాళ్ల కొరతతో చాలా చోట్ల దవాఖానలు ఏర్పాటు చేయలేదని, ఆ హాల్స్​లభించకపోతే భవనాలను అద్దెకు తీసుకొని ఏర్పాటు చేయాలని ప్రజలు కోరుతున్నారు. 

ఒక్కొక్క బస్తీ దవాఖాన ఉన్న వార్డులు 

హైదరాబాద్​జిల్లాలో పత్తర్​గట్టి, మొఘల్​పురా, నవాబ్​సాహెబ్​కుంట, ఘన్సీ బజార్, కిషన్​బాగ్, జియాగూడ, మంగళ్ హాట్, లంగర్​హౌస్​, నానల్​నగర్, గుడి మల్కాపూర్, ఆసిఫ్​నగర్, రెడ్​హిల్స్, అంబర్ పేట్, బాగ్​అంబర్​పేట్, అడిక్​మెట్, అమీర్​పేట్, బౌద్దనగర్, రాంగోపాల్ పేట్​ఇలా18 వార్డుల్లో ప్రస్తుతం ఒక్కో బస్తీ దవాఖాన మాత్రమే ఉంది.