పెళ్లి కావటం లేదని జనగామ జిల్లాలో మహిళా కానిస్టేబుల్ ఆత్మహత్య చేసుకున్న ఘటన మరువక ముందే.. మరో మహిళా కానిస్టేబుల్ సూసైడ్ చేసుకోవడం సంచలనంగా మారింది. ఈ ఘటనలతో మహిళా కానిస్టేబుల్స్ మానసిక పరిస్థితిపై పోలీసు వర్గాల్లో ఆందోళన నెలకొంది. శనివారం (ఏప్రిల్ 19) వరంగల్ జిల్లాలో చీరతో ఉరివేసుకుని లేడి కానిస్టేబుల్ ఆత్మహత్యకు పాల్పడటం చర్చకు దారితీసింది.
వరంగల్ జిల్లా కాజీపేట దర్గా ప్రాంతంలో ఘటన . అర్చన అనే మహిళా కానిస్టేబుల్ ఆత్మహత్యకు పాల్పడింది. 2022 లో వివాహం జరిగి కొద్దిరోజులకే విడాకులు అయినట్లు స్థానికులు చెబుతున్నారు. అప్పటినుంచి మానసికవేదనకు గురవుతూ జీవితంపై విరక్తితో ఆత్మహత్య చేసుకున్నట్టు తెలుస్తోంది. కానిస్టేబుల్ అర్చన కొద్దిరోజులుగా డ్యూటీకి సెలవు పెట్టి పోటీ పరీక్షలకు ప్రిపేర్ అవుతోంది.
పెండ్లి సంబంధాలు కుదరడం లేదని మనస్తాపంతో జనగామ జిల్లా కొడకండ్ల మండలం నీలిబండ తండాకు చెందిన ఏఆర్ కానిస్టేబుల్ గుగులోతు లీల (26) సూసైడ్ చేసుకున్న విషయం తెలిసిందే. ఆ ఘటన తర్వాత శనివారం అర్చన అనే మహిళా కానిస్టేబుల్ ఆత్మహత్య చేసుకుంది. మహిళా కానిస్టేబుళ్ల వరుస ఆత్మహత్యలతో పోలీసువర్గాలను ఆందోళనకు గురి చేస్తోంది.
