సిరిసిల్ల టౌన్, వెలుగు : ఎస్సీ వర్గీకరణను వ్యతిరేకిస్తూ సోమవారం రాజన్నసిరిసిల్ల కలెక్టరేట్‌ ఎదుట వర్గీకరణ వ్యతిరేక పోరాట సమితి ప్రతినిధులు నిరసనకు దిగారు. ఈ సందర్భంగా వారు మాట్లాడుతూ ఎస్సీ వర్గీకరణ తీర్పు సరికాదన్నారు. ఆర్టికల్ 341, 42 ప్రకారం ఎస్సీ రిజర్వేషన్లలో మార్పు చేసేందుకు రాష్ట్రాలకు అధికారం లేదన్నారు. మార్పులు చేయాలంటే పార్లమెంట్‌‌లో బిల్లు పెట్టి ఆ తర్వాత రాష్ట్రపతి ఆమోదం పొందాలన్నారు. కేవలం రాజకీయ ఒత్తిళ్లతోనే ఈ తీర్పు వచ్చినట్లు తాము భావిస్తున్నామన్నారు. ఈ తీర్పును పున: సమీక్ష చేయాలని కోరారు. కార్యక్రమంలో పోరాట సమితి అధ్యక్షుడు రొడ్డ రాంచంద్రం, నీరాటి శ్రీనివాస్, మంగ్ కిరణ్, సత్యం తదితరులు పాల్గొన్నారు.
ఎస్సీ వర్గీకరణ తీర్పు బీజేపీ కుట్ర
గోదావరిఖని, వెలుగు : ఎస్సీ వర్గీకరణ తీర్పు బీజేపీ ప్రభుత్వ కుట్ర అని, వర్గీకరణకు వ్యతిరేకంగా ఈ నెల 11, 12 తేదీల్లో ఢిల్లీ జంతర్మంతర్ వద్ద నిర్వహించనున్న ఆందోళనలో మాల, ఉపకులాలు వారు పెద్ద సంఖ్యలో పాల్గొని నిరసన తెలపాలని మాల మహానాడు ఆఫ్ ఇండియా జాతీయ అధ్యక్షుడు డాక్టర్ పసుల రాంమూర్తి పిలుపునిచ్చారు. సోమవారం గోదావరిఖనిలో ‘హలో మాల.. చలో ఢిల్లీ’ పోస్టర్‌‌‌‌ను ఆయన విడుదల చేశారు. జాతీయ యువజన విభాగం ప్రధాన కార్యదర్శి మగ్గిడి దీపక్ కుమార్, రాష్ట్ర కార్యదర్శి గంట బబిత, రాష్ట్ర మహిళా ఉపాధ్యక్షురాలు ఆరే దేవకర్ణ, లీడర్లు ఎరుకల లక్ష్మణరావు, గాదం శ్రీనివాస్ తదితరులు పాల్గొన్నారు.
