న్యూఢిల్లీ: ఆంధ్రప్రదేశ్ కాంగ్రెస్ చీఫ్ వైఎస్ షర్మిల ఏఐసీసీ అగ్రనేతలతో భేటీ అయ్యారు. మంగళవారం (జవనరి 14) ఢిల్లీ వెళ్లిన షర్మిల.. ఏఐసీసీ అధ్యక్షుడు మల్లికార్జున ఖర్గే, ఏఐసీసీ ప్రధాన కార్యదర్శి కేసీ వేణుగోపాల్తో సమావేశమయ్యారు. ఏపీలో పార్టీ బలోపేతంపై ఇరువురి నేతలతో ఆమె చర్చించారని తెలిసింది. ఇటీవల సొంత పార్టీ నేతల నుండే షర్మిలకు అసమ్మతి ఎదురు అవుతోంది. ఏపీ కాంగ్రెస్ నేతలు బహిరంగంగానే షర్మిలపై విమర్శలు గుప్పిస్తు్న్నారు.
షర్మిల ఏక పక్షంగా వ్యవహరిస్తున్నారని కొందరు.. యాక్టివ్గా పార్టీ కార్యక్రమాలు చేపట్టడం లేదని కొందరు.. కేవలం ప్రెస్ మీట్లతోనే రాజకీయ పబ్బం గడుపుతున్నారని ఇంకొందరు.. ప్రభుత్వ వైఫల్యాలను ప్రశ్నించాల్సింది పోయి సోదరుడు జగన్తో వ్యక్తిగత వివాదాలకు దిగుతున్నారని ఇంకొందరు షర్మిలను టార్గెట్ చేస్తున్నారు. ఈ నేపథ్యంలో షర్మిల పార్టీ పెద్దలను కలవడంతో ఈ భేటీకి ప్రాధాన్యత సంతరించుకుంది.
ALSO READ | సైబర్ నేరాల పట్ల అప్రమత్తంగా ఉండాలి : నిర్మల్ఎస్పీ జానకి షర్మిల
అయితే.. షర్మిల ఢిల్లీ టూర్ వెనక ఎలాంటి రాజకీయ కోణం లేదని.. 2025, జనవరి 15వ తేదీన ఢిల్లీలో నూతనంగా నిర్మించిన ఏఐసీసీ ప్రధాన కార్యాలయ ప్రారంభోత్సవ కార్యక్రమం ఉందని.. ఈ కార్యక్రమంలో పాల్గొనేందుకు షర్మిల ఢిల్లీ వెళ్లారని ఆమె సన్నిహితులు తెలిపారు. ఏఐసీసీ కార్యాలయ ప్రారంభోత్సవానికి అన్ని రాష్ట్రాల పీసీసీలు, కాంగ్రెస్ పాలిత రాష్ట్రాల సీఎంలు, ఇతర కీలక నేతలకు ఏఐసీసీ ఆహ్వానం పంపింది. ఇందులో భాగంగానే ఆమె హస్తినా వెళ్లారు.
