సింహాచలం శ్రీ వరాహ లక్ష్మీనరసింహస్వామి ఆలయంలో గోడ కూలి మృతి చెందిన కుటుంబాలకు ఏపీ ప్రభుత్వం రూ. 25 లక్షల పరిహారం ప్రకటించింది. ఈ ఘటనలో గాయపడిన వారికి రూ. 3 లక్షల చొప్పున అందించనున్నట్టు తెలిపింది. మంగళవారం (ఏప్రిల్ 29) రాత్రి ఆలయంలోని రూ. 300 టికెట్ కౌంటర్ వద్ద గోడ కూలి 8 మంది భక్తులు మృతి చెందిన విషయం తెలిసిందే.
ఈ ఘటనపై తీవ్ర దిగ్భ్రాంతి వ్యక్తం చేశారు సీఎం చంద్రబాబు. మంత్రులు, ఉన్నతాధికారులతో టెలికాన్ఫరెన్స్ నిర్వహించారు. ఈ సందర్భంగా పరిహారం అందజేయాలని ఆదేశించారు. అలాగే, బాధిత కుటుంబ సభ్యులకు దేవాదాయశాఖ పరిధిలోని ఆలయాల్లో అవుట్ సోర్సింగ్ విధానంలో ఉద్యోగం కల్పించాలని సూచించారు.
రూ.2 లక్షల పరిహారం ప్రకటించిన కేంద్రం:
సింహాచలం దుర్ఘటనపై ప్రధాని మోదీ స్పందించారు. ఈ ఘటన తీవ్రంగా కలచివేసిందని అన్నారు. మృతుల కుటుంబాలకు రూ.2 లక్షల పరిహారం ప్రకటించారు. అదేవిధంగా గాయపడినవారికి 50 వేల రూపాయల ఆర్థిక సాయం అందించాల్సిందిగా ఆదేశించారు.
భక్తులు ప్రాణాలు కోల్పోవటం బాధాకరం: వైఎస్ జగన్
లక్ష్మీ నరసింహ స్వామి ఆలయంలో జరిగిన ప్రమాదంపై వైఎస్సార్‌సీపీ అధినేత, మాజీ సీఎం వైఎస్ జగన్ మోహన్‌రెడ్డి తీవ్ర దిగ్భ్రాంతిని వ్యక్తం చేశారు. చందనోత్సవం సందర్భంగా గోడ కుప్పకూలి భక్తులు చనిపోవడంపై తీవ్రవిచారం వ్యక్తం చేశారు. ఈ ఘటనలో తీవ్రంగా గాయపడ్డ వారికి మెరుగైన వైద్యం అందించాలని, మరణించిన భక్తుల కుటుంబాలను ఆదుకోవాలని ఆయన ప్రభుత్వాన్ని కోరారు.
