- కేడబ్ల్యూడీటీ 2కు సమర్పించిన అఫిడవిట్లో ఏపీ వాదన
- గోదావరి డైవర్షన్లో 45 టీఎంసీలు ఏపీవేనని వెల్లడి
- 2 వారాల్లోగా అఫిడవిట్ ఇవ్వాలని తెలంగాణకు ట్రిబ్యునల్ ఆదేశం
- వచ్చే నెల 6 నుంచి క్రాస్ ఎగ్జామినేషన్
హైదరాబాద్, వెలుగు : శ్రీశైలం, నాగార్జునసాగర్ప్రాజెక్టుల్లో తెలంగాణకు కేవలం 121 టీఎంసీలు మాత్రమే వాటా ఉన్నదని..తమకు 386 టీఎంసీల వాటా ఉన్నదని ఏపీ సర్కార్ వాదిస్తున్నది. ఆ మేరకే కృష్ణా నదిలో నీటి కేటాయింపులను చేపట్టాలని బ్రజేశ్ కుమార్ ట్రిబ్యునల్ (కృష్ణా వాటర్ డిస్ప్యూట్ ట్రిబ్యునల్ 2– కేడబ్ల్యూడీటీ 2)కి విజ్ఞప్తి చేసింది. శుక్రవారం ట్రిబ్యునల్లో అఫిడవిట్ దాఖలు చేసింది. అంతర్రాష్ట్ర నదీ జలాల వివాదాల చట్టం 1956లోని సెక్షన్ 3 ప్రకారం.. ఉమ్మడి ఏపీకి కేటాయించిన 1005 టీఎంసీలతో పాటు పోలవరం గోదావరి డైవర్షన్లోని 45 టీఎంసీలను కలిపి మొత్తం 1050 టీఎంసీల కృష్ణా జలాలను రెండు తెలుగు రాష్ట్రాల మధ్య పంపిణీ చేయాల్సిందిగా నిరుడు అక్టోబర్లో కేంద్ర ప్రభుత్వం కొత్త గైడ్లైన్స్ను జారీ చేసింది. ఆ విచారణలో భాగంగా ఇప్పటికే రెండు రాష్ట్రాలూ స్టేట్మెంట్ ఆఫ్ కేస్ (ఎస్ వోసీ)లను సమర్పించాయి. అయితే, ప్రాజెక్టుల ఆపరేషన్ ప్రొటోకాల్ అంశాలను మాత్రం సాక్షుల ద్వారా విచారించాలని ఏపీ ప్రభుత్వం ప్రతిపాదించింది. దీంతో సాక్షుల అఫిడవిట్ను సమర్పించాలని ట్రిబ్యునల్ ఆదేశించడంతో.. ఏపీ తరఫున సాక్షిగా అనిల్ కుమార్ గోయల్అఫిడవిట్ను ఆ రాష్ట్ర ప్రభుత్వం సమర్పించింది. జూరాలకు కొత్తగా ఆపరేషనల్ ప్రొటోకాల్ఏమీ అవసరం లేదని పేర్కొన్న ఏపీ.. మిగతా రెండు ప్రాజెక్టుల విషయంలో మాత్రం మార్పులు, చేర్పులు చేయాలని కోరింది.
బచావత్ అవార్డు ప్రకారమే చేయాలి
ప్రస్తుతం శ్రీశైలం, నాగార్జునసాగర్ ప్రాజెక్టులకు సంబంధించి కేడబ్ల్యూడీటీ 2 ప్రకారంగా ఆపరేషన్ ప్రొటోకాల్ రూపొందించారని.. అయితే, కేడబ్ల్యూడీటీ 1 (బచావత్ ట్రిబ్యునల్) అవార్డు ప్రకారమే ఆపరేషన్ ప్రొటోకాల్నిర్వహించాలని అఫిడవిట్లో ఏపీ సర్కారు పేర్కొంది. దాని ప్రకారం చేసిన నీటి కేటాయింపులను కొనసాగించాలని కోరింది. జూరాల ప్రాజెక్టు నుంచి 46 టీఎంసీలకు మించి వాడుకోకుండా తెలంగాణను కంట్రోల్ చేయాలని, అంతకు మించిన వరదను దిగువకు ఇచ్చేయాలని స్పష్టం చేసింది. శ్రీశైలంలో మినిమం డ్రా డౌన్ లెవెల్ను 834 అడుగులు కాకుండా.. 854 అడుగులుగానే నిర్ధారించాలని తెలిపింది. క్యారీ ఓవర్ జలాలను పాత కేటాయింపుల ప్రకారమే వాడుకోవాల్సి ఉంటుందని పేర్కొంది. ఫ్లడ్ సీజన్ తర్వాత మే వరకు నీటిని వాడుకున్నాక.. ఎండీడీఎల్ 854 అడుగులకు పైన ఉన్న నీటిని జూన్, జూలై నెలల్లో వాడుకునేలా క్యారీ ఓవర్కు అవకాశం ఇవ్వాలని విజ్ఞప్తి చేసింది. పోలవరం నుంచి గోదావరి జలాల డైవర్షన్ ద్వారా ఎగువ రాష్ట్రాలకు లభించే 80 టీఎంసీల వాటాలో 45 టీఎంసీలపై పూర్తి హక్కు ఏపీకే ఉంటుందని తెలిపింది.
పెన్నా రిజర్వాయర్లకు శ్రీశైలమే ఆధారం
బచావత్ ట్రిబ్యునల్ కేటాయింపులతో శ్రీశైలం ప్రాజెక్టు.. పెన్నా–కృష్ణా బేసిన్ల ఉమ్మడి రిజర్వాయర్గా మారిందని అఫిడవిట్లో ఏపీ పేర్కొంది. పెన్నా బేసిన్లోని వెలిగోడు, కండలేరు వంటి ప్రాజెక్టులు శ్రీశైలం ప్రాజెక్టుపై ఆధారపడాల్సిన పరిస్థితి ఉందని వెల్లడించింది. పులిచింతల ప్రాజెక్టును పూర్తిగా కృష్ణా డెల్టాకు నీటిని కేటాయించేందుకే వినియోగించాలని కోరింది. కాగా, ఏపీ అఫిడవిట్కు రిప్లైగా రెండు వారాల్లోగా అఫిడవిట్దాఖలు చేయాలని తెలంగాణ సర్కారును ట్రిబ్యునల్ ఆదేశించింది. ఏపీ సాక్షి అనిల్ కుమార్ గోయల్ అఫిడవిట్ ఆధారంగా.. వచ్చే నెల 6, 7, 8వ తేదీల్లో తెలంగాణ తరఫు అడ్వొకేట్క్రాస్ఎగ్జామినేషన్ చేయనున్నారు.
