ఏపీ మహిళలకు ప్రభుత్వం శుభవార్త చెప్పింది. ఎన్నికల హామీలలో ఒకటైన మూడు ఉచిత గ్యాస్ సిలిండర్ల పథకాన్ని దీపావళి నుండి అమలు చేయనున్నట్టు ప్రకటించింది. ఈ పథకంపై సోమవారం సీఎం చంద్రబాబు నాయుడు సంబంధిత అధికారులతో సమీక్ష నిర్వహించారు. ఈ సమావేశంలో మంత్రి నాదెండ్ల మనోహర్, పౌరసరఫరాల శాఖ ఉన్నతాధికారులు పాల్గొన్నారు.
ఈ సంధర్భంగా మాట్లాడిన ఏపీ సీఎం.. మహిళల సంక్షేమం కోసం కూటమి(టీడీపీ- జనసేన-బీజేపీ) ప్రభుత్వం కట్టుబడి ఉందన్నారు. దీపం పథకం ఏపీ చరిత్రలో మైలురాయిగా నిలుస్తుందని అన్నారు. ఆడపడుచులకు ఏ విధమైన ఇబ్బందులు లేకుండా ఏడాదికి మూడు గ్యాస్ సిలిండర్లు ఉచితంగా ఇవ్వాలని నిర్ణయించామన్నారు. ఈ పథకం అమలుతో ఏపీ ప్రభుత్వంపై ఏటా రూ.2,684 కోట్ల భారం పడనుంది.
కండిషన్స్ అప్లై..
ఎన్నికల మ్యానిఫెస్టోలో ఈ పథకానికి ఆడపడుచులందరూ అర్హులే అన్నట్లు ఉన్నప్పటికీ.. ఇప్పుడు కండిషన్స్ పెట్టారు. ప్రధాన మంత్రి ఉజ్వల యోజన పథకం కింద అర్హులైన వారికి మాత్రమే దీపం పథకంలో 3 సిలిండర్లు ఉచితంగా అందించనున్నారు. అలాగే, లబ్దిదారులు ముందుగా డబ్బులు చెల్లించి గ్యాస్ సిలిండర్ తీసుకోవాలి. తరువాత రోజుల్లో లబ్దిదారుల బ్యాంకు ఖాతాల్లో సబ్సిడీని జమ చేస్తారు.
అర్హతలు
- ఆంధ్రప్రదేశ్ పౌరులై ఉండాలి.
- తెల్లరేషన్ కార్డు ఉండాలి.
- గ్యాస్ కనెక్షన్ ఉండాలి.
- బీపీఎల్ కుటుంబాలు మాత్రమే అర్హులు
అవసరమైన పత్రాలు
- ఆధార్ కార్డు
- తెల్ల రేషన్ కార్డు
- మొబైల్ నంబర్
- కరెంట్ బిల్లు
- స్థానికతను ధృవీకరించే సర్టిఫికెట్
ముందుగా లభ్డిదారులు దీపం పథకం కింద మూడు సిలిండర్ల కోసం ఆన్‌లైన్‌లో దరఖాస్తు చేసుకోవాలి. అధికారులు సూచించిన విధంగా సంబంధిత వెబ్ సైట్ లో లబ్దిదారుల పేరు, చిరునామా నమోదు చేయాలి. ఆ సమయంలో అవసరమైన డాక్యుమెంట్ల ఫొటోలు ఆన్‌లైన్‌లో అప్ లోడ్ చేయాలి. ఆ దరఖాస్తుదారులను అధికారులు పరిశీలించి, అర్హులైన వారికి ఏడాదికి మూడు ఉచిత గ్యాస్ సిలిండర్లు అందిస్తారు.
ALSO READ | అమరావతి డ్రోన్ సమ్మిట్ 2024 ప్రారంభించిన సీఎం చంద్రబాబు
